Ла Лигада иккинчи энг кўп гол урган футболчи янги клубга ўтмоқда

Испаниянинг «Мальорка» клуби шарафини ҳимоя қилаётган форвард Ведат Мурики яқин орада жамоасини алмаштириши мумкин. Бу ҳақда маълумотни ижтимоий тармоқларда журналист Ягиз Сабунджуоглу эълон қилди.

Маълумотларга кўра, 32 ёшли ҳужумчи Истанбулнинг «Фенербахче» клуби раҳбарияти билан музокаралар ўтказган. Томонлар ҳамкорлик шартларини келишиб олгани айтилмоқда.

Потенциал трансфер қиймати тахминан 15 миллион евро атрофида баҳоланмоқда.

Ўтган мавсумда Ведат Мурики Испания чемпионати доирасида «Мальорка» таркибида 37 та учрашувда майдонга тушди. У шу давр мобайнида 23 та гол урди, шуларнинг бештаси пенальтидан киритилган.

Шунингдек, у бир бор голли узатма муаллифига айланди. Бомбардирлар пойгасида у фақат Килиан Мбаппега йўл бериб, иккинчи ўринни эгаллади.