Лаосда термамиз учун яна бир муаммо, аммо бу баҳона бўлмаслиги керак
Ўзбекистон Миллий терма жамоаси 19 ноябрь куни "ЖЧ-2026" саралаши 6-тури доирасида Шимолий Кореяга қарши баҳс олиб боради.
Мазкур беллашув сиёсий сабабларга кўра, Лаосда ўтказилади. Мазкур мамлакат иқлими - субекваториал бўлиб, ҳатто қишда ҳам ҳаво ҳарорати 15-20 градус атрофида бўлади.
Шунингдек, мазкур мамлакатда намлик жуда юқори. Солиштириш учун айни вақтда Ўзбекистон ҳудудида намлик 39 фоизни ташкил этса, Лаосда бу кўрсаткич - 81 фоиз. Ҳозирда Лаос пойтахти Вьентьянда ҳаво ҳарорати 28 градус ва термамиз футболчилари айнан шу ерда машғулотларни давом эттирмоқда.
Биласиз, термамиз айни вақтда бу мамлакатда Шимолий Кореяга қарши тайёргарликни давом эттирмоқда. Терма машғулотларига борган блогер Абдураҳмон Фазиловнинг видеосида Жалолиддин Машариповнинг либоси машғулотлардан сўнг жиққа ҳўл бўлганини кўриш мумкин.
"Бу сизларга "водопровод"нинг суви эмас Лаоснинг ҳавоси", - дея таъкидлади блогер ўз видеосида.
Бундан ташқари, Жалолиддин Машарипов термамиз мухлисларидан қўллаб-қувватлаб, дуо қилиб туришларини сўради ва жамоамиз ютишини таъкидлаб ўтди.
Таъкидлаш керак, Лаосда саралашнинг мазкур босқичида корейслар икки ўйин ўтказди. Жумладан, улар Қатар билан бу мамлакатда дурангга имзо чеккан бўлса, бир неча кун бўлиб ўтган баҳсда Эронга жиддий қаршилик кўрсатиб, якунда 2:3 ҳисобида мағлубиятга учради.
Қайд этиш лозим, вакилларимиз "Янги Лаос Миллий стадиони"да Шимолий Кореяга қарши ўйнайди. Мазкур стадион 2009 йилда қуриб тугатилган бўлиб, 25 минг мухлисни ўз бағрига сиғдира олади.
Айни вақтда термамиз "ЖЧ-2026" саралаши доирасида "А" гуруҳида 10 очко билан иккинчи бўлиб турибди. 2 очкоси бор Шимолий Корея эса гуруҳда сўнгги поғонани банд этган.
Карим Худайқулов тайёрлади
Фикрлар