Лазизбек Муллажонов профессионал боксда иккинчи жангини ўтказади. Рақиб ҳам маълум бўлди

Профессионал бокснинг супероғир вазн тоифасида фаолият олиб бораётган ёш ва умидли боксчимиз Лазизбек Муллажонов (1-0, 1КО) ушбу йўналишдаги юришини давом эттиради. Муллажонов 4 июнь куни Россиянинг Санкт-Петербург шаҳрида бўлиб ўтадиган бокс оқшомида рингга кўтарилади. Мазкур беллашувда Муллажоновга эстониялик Антон Шомкин (14-14, 12КО) рақиблик қилади. 

22 ёшли Муллажонов ҳаваскор боксда ёшлар ўртасида Осиё чемпионлигини қўлга киритган. Шунингдек, у катталар ўртасида Ўзбекистон чемпиони ва кўплаб нуфузли халқаро турнирлар ғолиби саналади. У 29 январь куни ўтказган профессионал боксдаги дебют жангида Александр Стефановни 2-раундда техник нокаут эвазига мағлуб этган эди.