Легионеримиз кетиш сабаби ва қозоқ футболи камчилигини айтиб кетди!

Ўзбекистон миллий терма жамоаси ҳужумчиси Игорь Сергеев кутилмаганда жамоасини алмаштирди. УЕФА таркибига кирувчи Қозоғистон Премьер-лигасида “Тобол” шарафини ҳимоя қилаётган легионеримиз Осиё вакили – Таиланднинг “Би Жи Патхум Юнайтед” клубини танлади.

Тажрибали ҳужумчимиз Prosports.kz сайтига берган интервьюсида “Тобол”дан кетиши, янги жамоага ўтгани ва Қозоғистон чемпионатининг кучли томонлари ҳамда камчиликлари ҳақида гапирди.

Sports.uz портали Игорь Сергеевнинг интервьюсини ўзбек тилида эътиборингизга ҳавола қилади.

- Игорь, салом. “Тобол”дан кетишингиз сабаби нимага боғлиқ эканини айтсангиз...

- Салом. Яхши таклиф тушди. Мен уни кўриб чиқишга қарор қилдим. Бу жараёнда нималарнидир ўзгартириш ва олдинга қараб ҳаракатланиш кераклигини тушуниб етдим.   

- Янгиликларда фаолиятингизни Таиландда давом эттиришингиз айтилди. Шу ростми?

- Ҳа, ҳаммаси тўғри.

- Маълумотларга қараганда, кетишингиз клубни молиялаштириш қисқартирилаётгани боис, раҳбарияти ташаббуси экан. Шунга изоҳ берсангиз.

- Кимлар бунақа ёзганини билмайман. Йил охиригача шартномам бор эди. Унда ёзда кетишимни таъминловчи банд киритилган. Агар раҳбарият кетишимни истаган тақдирда ҳам бунинг имкони йўқ эди. Чунки қўлимда шартнома турибди.

Шунинг учун ҳаммаси ҳар икки томон розилиги билан бўлди, ҳеч қандай зиддиятлар бўлгани йўқ. Ҳаммаси профессионал даражада ҳал этилди.

- Сўрамасам бўлмайди, айтишларича, визани расмийлаштиришда муаммолар бор экан. Қозоғистонда қолишингиз эҳтимоли бор экан. Бунга нима дейсиз?

- Бундай эмас. Бу борада ҳеч қандай қийинчилик йўқ. Қолишим эҳтимоли жуда ҳам паст.

- Хулоса ўрнида, Қозоғистон чемпионатининг даражасини баҳолаб, ўзингиз аввал ўйнаган лигалар билан солиштириб берсангиз.

- Чемпионат даражаси яхши, сифатли ўйинчилар бор, яккакурашлар кўп. Мусобақа жадвалининг қуйи қисмидаги жамоалар етакчи клубларни ютиб қўяётгани кўп нарсадан далолат беради. Лекин майдонларнинг аҳволи ва ҳакамлик сифатини яхшилаш талаб этилади.

Таъкидлаш жоизки, Игорь Сергеев Қозоғистон чемпионатига 2021 йилнинг бошида кўчиб ўтган эди. Дастлаб, “Актобе” билан шартнома имзолаган ҳужумчимиз ярим йилдан кейин халқаро майдондаги мусобақаларда муваффақиятли иштирок этишни режалаштирган “Тобол” сафига қўшилди.

Кустанай жамоаси сафида 30 ёшли футболчимиз жами 66 маротаба майдонга тушиб, ўз ҳисобига 26 та гол ёздириб қўйди.

Сергеев “Тобол” таркибида Қозоғистон Премьер-лигаси олтин ва бронза медалларини қўлга киритди. Шунингдек, Суперкубок соҳибига айланди.