Legionerimizning yagona goli jamoasiga g‘alaba keltirdi

Turkiya Superligasining yangi mavsumiga puxta tayyorgarlik ko‘rayotgan “Sivasspor” jamoasi bir necha bosqichli o‘quv-mashg‘ulot yig‘inlarini o‘tamoqda.

Yig‘inlada O‘zbekiston milliy terma jamosi a’zosi Azizbek Turg‘unboev ham faol ishtirok etmoqda.

“Sivasspor” futbolchilari navbatdagi o‘rtoqlik uchrashuvida “Erzurumspor” jamoasiga qarshi maydonga tushdi.

Qiziqarli o‘tgan bellashuvda sivasliklar kichik hisobda zafar quchdi. Bahsning 56-daqiqasida Azizbek Turg‘unboev tomonidan kiritilgan gol yagonaligicha qoldi.

“Sivasspor” o‘tgan mavsumni ettinchi pog‘onada yakunlagan edi. Bu gal jamoa oldiga yuqori o‘rinlar uchun kurashib, Evrokuboklarga yo‘llanma olish vazifasi yuklatilgan.

Azizbek Turg‘unboev 2024 yilning yanvar oyida Qatarda o‘tkazilgan Osiyo kubogidagi muvaffaqiyatli o‘yinidan keyin Turkiya klubi bilan shartnoma tuzib, faoliyatida ilk bor legionerga aylangan edi.

Bir necha pozitsiyada o‘ynay oladigan tajribali universal futbolchimiz Turkiya Superligasidagi debyut mavsumida 12 marotaba maydonga tushib, o‘z hisobiga bitta gol ham yozdirib qo‘ydi.

Turkiyada Superliganing yangi mavsumi 11 avgustdan start oladi. “Sivasspor” futbolchilar birinchi turda o‘z maydonida etakchi klublardan hisoblangan “Trabzonspor” jamoasini qabul qiladi.