Levan Arveladze: "O‘zbekiston Superligasi men uchun yangi tajriba bo‘ldi"

“Andijon” safida ikki yildan beri faoliyat olib borayotgan legioner Levan Arveladze “Burgutlar”ning g‘alabalariga o‘z hissasini qo‘shdi. Yakuniga etgan chempionatda Levan “Andijon” tarkibida 30 ta o‘yinda maydonga tushib, 3 ta gol urdi.

- Levan, ahvolingiz yaxshimi? Mavsum tugagach, o‘zingizni qanday his qilyapsiz?

- Hozircha ishlarim yaxshi. Og‘ir o‘tgan mavsumdan keyin butun e’tiborimni tiklanishga qaratyapman. Mavsum parvozlar va pastga sho‘ng‘ishga boy bo‘ldi. Hozir ta’til vaqti. Yangi mavsumga yangi kuch va zo‘r ishtiyoq bilan kirib kelish uchun yaxshilab dam olishning ayni fursati.

- Bu yil ilk bor “Andijon” bilan Kubokni qo‘lga kiritdingiz. 2024 yil sizda qanday taassurot qoldirdi?

- Ajoyib his-tuyg‘ular va eng asosiysi, “Andijon” uchun tarixiy hisoblanadigan g‘alabaga hissamni qo‘sha olganimdan juda ham baxtiyorman. Muvaffaqiyat yo‘lida bizni zo‘r berib qo‘llab-quvvatlab kelgan ishqibozlarimizga ham rahmat aytmoqchiman. Zero, bu yutuqda ularning hissasi beqiyos bo‘ldi, deya baralla aytish kerak.

- Levan, “Andijon” jamoasida ikki mavsumni o‘tkazdingiz. Faoliyatingizda bu klubning o‘rni qanday?

- “Andijon”da futboldagi hayotimning bir qismini yashab o‘tdim, deya olaman. O‘zbekiston Superligasi men uchun yangi tajriba bo‘ldi. Ayniqsa, fanatlarning ishonchi va doim qo‘llab kelishlari ishga bo‘lgan ishtiyoqimni oshirishga yordam beryapti. Buning uchun ularga alohida rahmat aytmoqchiman.

- Kubok finalini necha marta tomosha qildingiz?

- Kubok finalini to‘liq holda faqat bir marta tomosha qildim. O‘zi shundoq ham bahs davomida esda qoladigan holatlarni xayolan yuz martalab o‘tkazaman.

- Jamoada eng jiddiy va qiziqarli futbolchi kim?

- Jamoamiz juda ham ahil. Jiddiy bo‘lish kerak bo‘lgan pallada hamma jiddiy, hazillashish paytida esa barcha quvnoq bo‘ladi! Eng jiddiylar Ildar Mamatkazin va Igor Litovka bo‘lishsa, eng quvnog‘i sifatida Vladimir Bubanyani ko‘rsatishim mumkin.

- Keyingi rejalaringiz qanday?

- Yana takroran aytmoqchiman: hozir ta’til va yaxshilab dam olmoqdaman. Shartnomam nihoyasiga etdi va yangi taklifni kutyapman. Yuqorida qayd etib o‘tganimdek, yangi mavsumga - yangi kuch va yangi vazifalar bilan kirib bormoqchiman.