Левандовски қанчага кўнди?

“Бавария”дан кетишни истаётган Роберт Левандовски ҳамон “Барселона”нинг ёзги трансферлардаги асосий нишони бўлиб турибди.

Mundo Deportivo нашрининг маълум қилишича, каталонияликлар польшалик тўпурарни олиш учун яхшигина харажатларга тайёр. Жумладан, клуб раҳбарияти трансфер учун таклиф қилинган аввалги суммани беш миллионга кўтариб, мюнхенликлардан ҳужумчининг бир йиллик шартномасини 35 миллион еврога сотиб олмоқчи.

Агар Левандовски “Барселона”ни чорловини қабул қиладиган бўлса, маошининг пасайтирилишига кўниши керак. Ҳозир ҳар мавсум учун 22 миллион евро миқдорида мояна олаётган футболчига каталонияликлар 18 миллион евро тўламоқчи.

Левандовскининг ўзи “Олтин тўп”ни олиш учун Испания ёки Англия клубларидан бирида ўйнаш керак, деб ҳисобламоқда. Чунки сўнгги йилларда бу совринни фақат Ла Лигада тўп тепган ўйинчилар – Лионель Месси, Криштиану Роналду ва Лука Модрич қўлга киритган.