Levchenkoning ishonchi, raqobat va muxlislar haqida "Neftchi"ning yosh yulduzi Ulug‘bek Hoshimov bilan intervyu

Xabaringiz bor, "Neftchi"  futbol klubi Turkiyada o‘quv-yig‘in mashg‘ulotlarini olib bormoqda.

Farg‘onaliklar matbuot xizmati iqtidorli hujumchi, O‘zbekiston OTJ a’zosi Ulug‘bek Hoshimov bilan Turkiyadagi jarayon va o‘tgan mavsum yakunlari bo‘yicha intervyu uyushtirdi.

-Ulug‘bek yangi mavsumga tayyorgarlik qanday kechmoqda?

"Tayyorgarlik rejasiga asosan, hozirgi kunda Antaliyada mashg‘ulotlar olib bormoqdamiz. Yangi mavsum uchun taassurotlar ijobiy. Mashg‘ulotlar ko‘ngildagidek o‘tmoqda".

-Yangi mavsumda ham jamoamiz safida to‘p suradigan bo‘ldingiz? Klubda qolishga ko‘proq nima turtki bo‘ldi?

“Neftchi” jamoasi bilan ikki yildan buyon birgamiz. Avvalambor, klubda qolishga Vitaliy Levchenkoning ishonchi omil bo‘ldi. Bundan tashqari, klubda ichki muhit a’lo darajada. Shularni inobatga olib, klubda qolishga qaror qildim".

-Yangi mavsumda hujum chizig‘ida yaxshigina raqobat ko‘rishimiz mumkin? Raqobatdan cho‘chimaysizmi?

"Raqobat bor joyda o‘sish bo‘ladi”, deb bejiz aytishmagan. Raqobatdan qo‘rqmayman, “Oxirini o‘ylagan qahramon bo‘lolmaydi!”

-Raqobat ko‘proq qaysi futbolchilar bilan bo‘ladi deb o‘ylaysiz?

"Hujum chizig‘i va qanot vingerlari barchasi raqobat qila oladi, deb o‘ylayman".

-Sizga sof markaziy hujumchi rolida o‘ynash qulaymi yoki qanot vingeri ampluasimi?

"O‘zimni har ikki pozitsiyada ham yaxshi his qila olaman. Asosiysi, qaysi pozitsiyaga qo‘yishsa, o‘sha chiziqda murabbiyning ko‘rsatmalarini bajara olaman".

-O‘tgan mavsumda jamoamiz ishtirokida siz uchun eng yorqin o‘yin qaysi bo‘ldi?

-"Istiqlol"da o‘tgan AGMKga qarshi bahs juda yorqin o‘tgandi. To‘g‘ri, o‘shanda mag‘lubiyatga uchragan edik. Biroq, uchrashuvda ochiq futbol namoyish etib, taktik jihatdan ustunlikka erishganmiz".

-Yangi mavsumda Ulug‘bek Hoshimovni 99-raqam ostida ko‘ramizmi?

"Ha, 99-raqamda harakat qilaman".

-Yangi mavsum oldidan muxlislar jamoamizdan yuqori saviyali futbol va katta g‘alabalarni kutmoqda.

"Xudo xohlasa, bu yil natijalarimiz ancha yaxshi bo‘ladi. Muxlislarimizdan “Neftchi” jamoasiga doimiy ishqibozlik qilishlarini so‘rab qolaman. Stadionlarni to‘ldirib qo‘llab turishsa, biz albatta muxlislarimizni g‘alabalar bilan xursand qilamiz".