“Ливерпуль” жаҳон чемпионини Англияга қайтаради

“Ливерпуль” раҳбарияти жамоа таркибини Мадриднинг “Атлетико” клубида ўйнаётган аргентиналик жаҳон чемпиони Хулиан Альварес билан кучайтирмоқчи. 
Аслида 25 ёшли ҳужумчи Англия Премьер-лигасига бегона эмас. У Мадридга кетишдан аввал “Манчестер Сити”да ўйнаган ва Эрлинг Холанднинг соясида қолишни истамагани учун Испанияга йўл олганди. 

“Атлетико” ҳужумчини қўйиб юборишга тайёр. Бунинг учун улар харидорлардан 100 миллион фунт миқдорида бадал пули талаб қилади. 

Anfield Watch нашрининг хабар беришича, “Ливерпуль” бу суммани тўлаш учун шартномага ўз ҳужумчиси Дарвин Нуньесни қўшмоқчи. Нуньеснинг трансфер нарзи 80 миллион фунтни ташкил қилади. 

Жорий мавсумда Альварес барча мусобақаларда 43 ўйинда иштирок этиб, 22 гол урди ҳамда 5 та голли узатма берди. Унга тузилган шартнома 2030 йилга қадар амал қилади. Transfermarkt сайтидаги маълумотларга кўра, футболчининг бозордаги қиймати 80 млн еврони ташкил этади.