"Ливерпуль" вакиллари Осимхеннинг агенти билан боғланди

"Ливерпуль" ёзги трансфер ойнасида ҳужум чизиғини кучайтирмоқчи.

Роберто Фирмино жамоани тарк этгандан сўнг, мерсисайдликлар ҳужумнинг олдинги сафида кучли футболчи олишни хоҳлашади.  “Қизиллар”нинг радарида мавсумни ажойиб ўтказган “Наполи” футболчиси Виктор Осимҳен турибди.

"Football Italia" нашрининг хабар беришича, "Ливерпуль" вакиллари аллақачон Осимхеннинг агенти билан боғланишган. Инглиз клуби "Наполи" 24 ёшли форвард учун 180 миллион евро талаб қилишини билади.

Юрген Клопп жамоасидан ташқари нигериялик ҳужумчига АПЛнинг яна икки гиганти "Челси" ва "Манчестер Юнайтед" ҳам қизиқиш билдирмоқда.

Эслатиб ўтамиз, 2022/2023 йилги мавсумда Осимхен 39 та ўйин ўтказиб, 31 та гол урди.