"Локомотив"га қарши ўйинда жароҳат олган "Навбаҳор" футболчиси Обид Жўрабоев қачон сафга қайтади?

Суперлига 2-тури доирасидаги “Локомотив” – “Навбаҳор” (1:0) учрашувида жароҳат олганлиги боис, 15-дақиқадаёқ захира ўриндиғидан жой олишга мажбур бўлган (унинг ўрнига майдонга Славко Лукич туширилди) тажрибали ҳимоячи Обид Жўрабоевнинг саломатлиги қандайлиги, унинг қачон машғулотларга қўшилиши кўпчилик мухлисларни қизиқтириши табиий. Шу боис клуб матбуот хизмати футболчи билан боғланиб, шунга ойдинлик киритди.

- “Локомотив”га қарши кечган баҳсда майдонга катта иштиёқ ва ғайрат билан тушгандим. Афсуски, жароҳат олганлигим боис, 15-дақиқадаёқ алиштирилдим. Жамоадошларимга муҳим ўйинда ёрдам беролмаслигимни билиб, майдонни кўзда ёш билан тарк этдим.

“Темирйўлчилар” билан бўлган баҳсда жамоамиз ажойиб ўйин намойиш этган бўлса-да, аламли тарзда мағлубиятга учради. Энди “Бунёдкор”га қарши кечадиган кейинги ўйинда зафар қучишга ҳаракат қиламиз.

Жароҳатим борасида тўхталадиган бўлсам, Худога шукр, шифокорларнинг фикрича, унчалик хавфли эмас экан. Эртадан якка ҳолда машқларни бажарсам, 3 апрелдан умумий машғулотларга қўшиламан. Худо хоҳласа, 6 апрель куни “Бунёдкор” билан бўладиган ўйинда майдонга тушаман, деган умиддаман, - деди Обид Жўрабоев.