Луис Энрике 6:1 ҳисобида ютган шогирдларини танқид қилди

Франция чемпионати пешқадами ПСЖ Лига 1 27-турида “Сент-Этьен” меҳмони бўлиб, сафар учрашувидан 6:1 ҳисобидаги ғалаба билан қайтди.

Парижликлар бош мураббийи учрашувдан кейин фикр билдириб, шогирдларининг беллашув бошидаги ўйинидан кўнгли тўлмаганини айтди.

- Умумий ҳисобда ўйиндан мамнунман, лекин шогирдларимнинг беллашув бошидаги ҳаракатларидан эмас. “Сент-Этьен” баҳсни интенсив бошлади. Биз биринчи бўлим охирига келиб, ўз даражамизга кўтарила олдик.

Иккинчи бўлим эса, шов-шувли бўлди, жуда кўп хавфли вазиятлар яратилиб, голлар урилди. Биз бўлажак баҳслар олдидан бу ҳолатдан тўғри хулоса чиқариб олишимиз керак, - деди Луис Энрике.

ПСЖ Франция чемпионатида 27-турдан кейин очколари сонини 71 тага етказиб олди. Чемпионат якунланишига етти тур қолганида амалдаги чемпион энг яқин таъқибчиси “Марсель”ни 21 очко ортда қолдираётгани учун бу йил ҳам чемпионликни сақлаб қолишига ҳеч ким шубҳа қилмаяпти.