Любинко Друлович Австралияга қарши ўйинда футболчиларни руҳлантириш учун биргина асосий сабаб борлигини айтди (Матбуот анжумани)

Хабарингиз бор, Таиландда 23 ёшгача футболчилар ўртасида Осиё чемпионати ўтказилмоқда. 

25 январь куни ушбу мусобақанинг 3-ўрин учун ўйини бўлиб ўтади. Унда Ўзбекистон олимпия терма жамоаси Австралия билан беллашади. Бугун эса учрашувдан олдинги матбуот анжумани ўтказилди. Унда дастлаб, терма жамоамиз устози Любинко Друлович қатнашди.

Любинко Друлович: Эртага муҳим, масъулиятли ўйин кутмоқда. Австралияга қарши баҳс қийин бўлади. Улар 4-4-2 тактикасида ўйнайди. Рақибимиз шаклланган жамоа. Биз ҳам ўз навбатида бор маҳоратимизни ишга соламиз. Сабаби бу ўйин бутун Ўзбекистон учун қанчалик аҳамиятли эканлигини билиб турипмиз. Шунинг учун ортга йўл йўқ. Бўлажак беллашувда Ўзбекистон халқини хурсанд қилмоқчимиз.

Йигитларни руҳлантириш учун биргина асосий сабабимиз бор, яъни ҳали ҳам Олимпиада йўлланмасини қўлга киритиш. Бу ўйиннинг аҳамиятини футболчилар яхши тушуниб туришибди. Бунинг учун бор имкониятимизни ишга соламиз.

Австралияга қарши ўйинларнинг натижаси бу Ўзбекистонга таъсир қилмайдими? Йўқ, учрашувдан олдин имкониятлар 50-50. Шунинг учун бу фикрлар бизга ёмон томондан таъсир қилади, деб ўйламайман.

23 январь куни Достон Ибрагимовнинг туғилгани куни бўлди. Унинг кайфияти яхши эди? Тўғри, унинг кайфияти яхши. У маҳоратли футболчи. Балки эртанги беллашувда Достон майдонга тушиб, бир ёки иккита гол урар. Асосийси, эртага бир жамоа бўлиб ҳаракат қилсак, ҳаммаси яхши бўлади. Қолаверса, ўйин нафақат бизга, балки Австралияга ҳам осон бўлмайди.

Исломжон Қобилов: Ўйинга ўзимизни тиклаб олишимиз керак эди 2-3 кун ичида. Охирги ўйин барча кучимизни ишга солиб, кучли Австралияни мағлубиятга учратишимиз керак.