Lyubinko Drulovich Avstraliyaga uchralgan mag‘lubiyatdan so‘ng: Afsus...

Hozirgina 23 yoshgacha futbolchilar o‘rtasidagi Osiyo chempionatida 3-o‘rin uchun o‘yin bo‘lib o‘tdi. Unda Avstraliya va O‘zbekiston o‘zaro bahs olib bordi.

O‘yinda "kengrular" ikkinchi taym boshida kiritilgan gol evaziga g‘alaba qozonishdi va Olimpiada yo‘llanmasiga ega chiqishdi.

Uchrashuvdan so‘ng tashkil etilgan matbuot anjumanida O‘zbekiston olimpiya terma jamoasi bosh murabbiyi Lyubinko Drulovich jurnalistlar savollariga javob berdi.

- O‘yin borasida biror nima deyish qiyin. Chunki bunday mag‘lubiyatni kutmagandik. O‘yinda futbolchilar yomon harakat qilishmadi. Kutilmaganda qizil kartochka uchrashuvga ta’sir qildi. Mening fikrimcha, bu vaziyatda qizil kartochka yo‘q edi. Futbolda shunday holatlar uchrab turadi. Afsus.

To‘g‘risini aytsam, shartnomam shu oy oxirigacha mo‘ljallangandi. Avval boshida bu borada kelishib olgandik.

Futbolchilar bilan faxrlanaman. Ular bor mahoratlarini ishga solib, harakat qilishdi. Ammo yo‘q joyda xatolar evaziga mag‘lub bo‘ldik. Futbolchilarga rahmat aytaman, ular juda ham yaxshi o‘yin ko‘rsatishdi.

Natijadan hafamiz. Kutilmaganda kichik xatolar zararimizga ishladi. Yarim final va 3-o‘rin uchun bahsda bitta gol evaziga imkoniyatni boy berdik.

Endi futbolchilar bu natijalarni esidan chiqargan holda biroz dam olib, kelajakdagi faoliyatiga e’tibor qaratishlarini xohlardim.

Shunday narsalar borki, ba’zan murabbiy ham o‘yinni nazoratga ololmay qoladi. Masalan, kutilmaganda Oybek Bozorov 5 daqiqa ichida qizil kartochka olib maydonni tark etdi. Bunday o‘yinlarda son jihatidan kam bo‘lgan jamoaga qiyin bo‘ladi. Shuning uchun imkoniyatni boy berdik. 

Tanqidlar? Bu normal holat. Buni to‘g‘ri qabul qilish kerak, har qanday vaziyatda ham tanqid bo‘ladi. Imkon darajasida ushbu holatda bunga to‘g‘ri qarayman. Har holda 40 yildan beri futbol ichidaman, - dedi murabbiy.