Mahmud Muradov ishtirokida matbuot anjumani bo‘lib o‘tdi yoxud u UFC ning qay chempioni bilan sparring jang o‘tkazgan edi?

Bugun, WYNDHAM mexmonxonasining anjumanlar zalida o‘zbekistonlik birinchi UFC jangchisi Mahmud Muradov bilan OAV xodimlari va muxlislar ishtirokida matbuot anjumani bo‘lib o‘tdi. Unda sportchi va unga ayni vaqtda murabbiylik qilayotgan Jasur Alijonov jurnalistlar va muxlislar tomonidan yo‘llangan savollarga javob berishdi.

- Navbatdagi raqibingiz Antonio Karlos Juniorga qarshi tayyorgarlik jarayonlari qanday kechmoqda?

- Barchasi yaxshi. Junior juda kuchli raqib hisoblanadi. Top 15 talikdan o‘rin olgan. Qolaversa, jui- jitsu bo‘yicha Braziliya chempioni ham bo‘lgan. Shunga yarasha biz ham murabbiylarim bilan birgalikda mashg‘ulotlarga zo‘r berganmiz.

- Sizni yaxshi va yomon kuningizda ham yoningizda bo‘lgan do‘stlaringizni ayta olasizmi?

- Albatta, bular ota-onam. Yaqinlarim, murabbiylarim.

- Sevgan qizingiz chexiyalik xonanda Monika Bagarovani yurtimizga olib kelish niyatingiz bormi?

- U bilan turmush qurganmiz. Mening o‘zbekistonlik ekanligimni inobatga olsak, u men bor joyga albatta keladi.

- Sizni ko‘p bora nogiron bolakaylar bilan uchrashib, ularga sovg‘alar ulashayotganligingizga bevosita guvoh bo‘lamiz va buni internet tarmoqlariga joylashtirasiz. Aytingchi, buni aynan shuning uchun qilasizmi yoki buni boshqa sababi bormi?

-  Bilasizmi, ularning ko‘zidagi quvonchni, shodliklarini ko‘rsangiz dilingiz yashnab ketadi. Albatta, buni shunchaki ommaga ko‘z-ko‘z qilish uchun qo‘ymayman. Menga bu kerak ham emas. Kim qanday o‘ylasa o‘ylayversin. Ularni shunchaki xursand qilish uchun bunday ishlarga qo‘l uraman. Qolaversa, internetdagi sahifalarim shaxsan o‘zimniki, shunday ekan xohlagan rasm va videolarni joylayman.

- Mahmud Murodovning avvalgi promousheni XFN da shogirdingiz Islombek Mahammadjonov debyut jangini o‘tkazdi va g‘alaba qozondi. Umuman ushbu promoushen bilan hamkorlikka Mahmud sababchi bo‘ldimi?

Jasur Alijonov: - Albatta, Bu borada Mahmud bizga katta yordam bermoqda. Islomning ushbu jangdagi g‘alabasidan so‘ng, XFN bilan shartnoma imzolandi. Qolaversa, birgina Islom emas, qolgan shogirdlarimiz ham nasib qilsa, Evropa oktagonlarida janglar o‘tkazishga yaqin turibdi.

-Xabib Nurmagomedov sizni bir vazn pastda jang qilishingiz kerakligini aytgan edi. Bu fikrga qanday qaraysiz?

-  Habib men haqimda fikr bildirganini eshitdim. Shunday yuqori saviyadagi sportchi bizni eslagani uchun xursand bo‘ldim. Biroq pastki vaznga tushish niyatim yo‘q hozircha. Albatta, vazn tashlay olaman. Bu qiyin-ku, lekin amallasa bo‘ladi. Shunday bo‘lsada, -84 kgda o‘zimni juda yaxshi his qilmoqdaman. Qolaversa,  mana shu vaznda eng tezkor sportchi bo‘lib turibman desam mubolag‘a bo‘lmas. Bu menga yordam bersa kerak deb o‘ylayman.

Amerikadagi mashg‘ulotlar jarayonida ayni vaqtdagi yarim o‘rta vazn toifasi chempioni Kamaru Usman bilan sparringda ishlaganman. U o‘sha paytda chempionlikka da’vogar edi. Xech bir jabhada unga yutqazmaganman. O‘shandayoq men UFCga o‘tishga tayyor ekanimni his qildim. O‘shandan beri bu yo‘nalishga o‘tishga harakat qildim. Bugun esa, ushbu niyatimga etdim. Albatta, kimlardir bu gaplarimni Kamaruni jangga chorladi deb tushunishlari mumkin. Yo‘q, men uni jangga chorlayotganim yo‘q. Shunchaki o‘z vaqtida hozir zo‘rman deb yurganlar bilan sparringda ishlab, ulardan kam emasligimni isbotlaganman.

- Xabib Nurmagomedov va Toni Fergyuson o‘rtasidagi jangda kim g‘olib bo‘ladi?

-  Shubhasiz, Xabib g‘alaba qozonadi.

- Konor MakGregor va Donald Serrone o‘rtasidagi jangdachi?

- Bilmayman va ko‘rmayman ham. Albatta, bular mendan kichik vaznda jang qilishadi. Men ko‘proq o‘z vazn toifamdagilarni jangini kuzataman.

- Ayni kunda UFC ning eng kuchli jangchisi kim?

- Xabib Nurmagomedov.

- Mahmud asosan “stoyka”da jang o‘tkazadi. Lekin u endi jahonning eng kuchli promoushenida... Ayniqsa, Israel Adesanya, Robert Uittaker, Paulo Kosta, Anderson Silva kabilar faoliyat olib boradigan o‘rta vazn toifasida harakat qiladi. Bu vaznda yaxshi natija qayd etish uchun jangchidan “kardio”ning mukammaligini va greplingdan ham yaxshi xabardor bo‘lish kerakligi talab etiladi. Bunga ham e’tibor qaratyapsizlarmi?

- Jasur Alijonov: Albatta. Navbatdagi raqibi ham aynan “parter”da yaxshi harakat qiladigan sportchi. Bu borada qisqa fursatda mukammallikka erishib bo‘lmaydi. Yaqinda u Braziliyaga jo‘nab ketadi va jangga qadar aynan shunday yo‘nalishda mashg‘ulotlarga zo‘r beradi.