Максим Шацких: "Жаҳон чемпионатига чиқиш қўлимиздан келади"

5 июнь куни Ўзбекистон миллий терма жамоамиз сафарда БААга қарши “ЖЧ-2026” саралашидаги жуда муҳим ўйинда майдонга тушади. Бўлажак учрашувда вакилларимиз ижобий натижа қайд этишса, тарихда илк бор мундиал йўлланмасини қўлга киритамиз.

Ўзбек футболи афсоналаридан бири, миллий терма жамоамиз сафида ёрқин фаолият олиб борган Максим Шацких ҳам бош жамоамизни кузатиб бормоқда ва мундиалга йўлланмани қўлга киритиш борасида қўллаб-қувватлаяпти. 

Ҳозирда "Андижон" бош мураббийи сифатида ишлаётган Шацких терма жамоамизга оид айрим саволларга жавоб қайтарди.

- Миллий терма жамоамиз жаҳон чемпионатига жуда яқин турибди. БААга қарши ўйин олдидан имкониятимизни қандай баҳолайсиз?

- Жаҳон чемпионатимизга чиқишимиз учун бизда доимгидан-да кўра жуда яхши имконият пайдо бўлган. Майдонга албатта ғалаба учун чиқишади ва йигитлар яхши ўйин кўрсата оладилар. Бу сафар жаҳон чемпионатига чиқиш масаласини ҳал қилишимиз керак. Бу орқали халқимизни хурсанд қилишимиз лозим. Жаҳон чемпионатига чиқиш қўлимиздан келади.

- Терма жамоа либосида тўп суриш қанчалик масъулиятли ва шарафли?!

- Ўйлайманки, Ўзбекистон миллий терма жамоаси либосини кийиш ҳаммага масъулият юклайди. Ушбу юртда туғилган ҳар қандай инсон учун терма жамоа либосини кийиш шараф, албатта. Бу жуда катта масъулият. Айниқса, ҳар бир ёш футболчини бундай формани кийиб майдонга тушиш орзуси бўлади. Ҳар қандай ўйинчи миллий терма жамоада юрт шарафини ҳимоя қилишни ёшлигидан орзу қилиб яшайди.

- Сиз Тошкентда Қувайтга қарши драматик кечган ўйин қаҳрамонларидан бирисиз. Ўша учрашувда гол ургансиз. Терма жамоамиз 0:2 ни 3:2 га айлантира олган. Ушбу баҳсдан қандай хотиралар қолган?  

- Қувайт билан ўйинни яхши эслайман. Қийин учрашув бўлганди. Биз дастлаб иккита тўп ўтказиб юборгандик. Яхши хулоса чиқариб, иккинчи таймда ажойиб ҳаракат қилганмиз. Ҳақли равишда 3:2 ҳисобида ғалаба қозонганмиз.

- 2006 йилги ЖЧ саралашида терма жамоамиз плей-оффда Баҳрайнга қарши ўйинда омадсизликка учраган. Ўшанда ҳам мундиалга яқин эдик...

- Баҳрайн билан жуда аламли ҳолат бўлганди. Ўтиш учрашувлари орқали биз жуда яқин келгандик. Буни эслайман, аммо анча бўлди. Бирини ўйинни ўз уйимизда ўйнагандик. 1:0 га ютаётгандик, кейин пенальти тепдик. Адашмасам, япониялик ҳакам эди ва у иш кўрсатган. Хотирам панд бермаётган бўлса, ўшанда қандайдир янги қонунларни жорий қилишганмиди?! Пенальтини бекор қилган. Хуллас, тушунарсиз вазиятлар юз берган. Шундан кейин техник ғалаба илинжида федерациямиз шикоят хати ёзган. Баҳрайн ҳақида бирор нарса дея олмайман. Бу ерда ҳакамларни қўпол равишдаги хатоси бўлган. Менимча, рақибга 3:0 ҳисобида техник мағлубият ёзилиши ҳақидаги шикоят хати тўғри бўлмаган, деб ўйлайман. Кейинги ўйинда Тошкентда 1:1 ўйнаганмиз. Сафардаги жавоб баҳсида 0:0 натижаси қайд этилган. Афсуски, жавоб баҳсида мен иштирок эта олмагандим. Баҳрайнда эдим, ўшанда касал бўлиб қолгандим. Адашмасам, бизда 89-дақиқада имконият бўлганди. Тепган тўпимиз дарвоза устунига тегиб қайтган. Бу сафар умид қиламанки, барча юртдошларимизнинг орзуси ушалади. Терма жамоамиз тўғридан-тўғри мундиал йўлланмасини қўлга кирита олади.