Максим Шацких "Насаф"дан учралган мағлубиятга изоҳ берди

Ўзбекистон Суперлигаси 20-туридан ўрин олган "Пахтакор" - "Насаф" учрашуви ниҳоясига етди. Унда меҳмонлар 1:0 ҳисобида зафар қучди.

Беллашув тақдирини қаршиликлар ҳимоячиси Дилшод Саитовнинг олис масофадан урган супер голи ҳал этиб берди.

Ўйиндан сўнг ҳар иккала жамоа бош мураббийи иштирокида матбуот анжумани бўлиб ўтди. Қуйида "шерлар" устози Максим Шацкихнинг фикрлари билан танишиб чиқинг. 

- Ҳаммага хайрли кеч. "Насаф" бугун ғалабани кўпроқ хоҳлади. Шу туфайли улар бугун ўз мақсадига эришди. Биринчи бўлимда бизда ҳеч нарса ўхшамади. Ўз амалиётимдан биламан, терма жамоадаги ўйинлардан сўнг муаммолар пайдо бўлади. Кардларда ҳам камчиликлар етарлича эди. Иккинчи таймда нимадирларни ўзгартиришга ҳаракат қилдик. Сўнгги пасни бериш бизда оғриқли муаммо бўлди. Шундай бўлса-да, иккинчи тайм биринчисидан анча яхшироқ бўлди.

- Таркибдаги йўқотишлар туфайли эҳтиёткорликка асосланган тактика танладингизми ёки "Насаф"нинг ҳужумкорлиги сабаб жамоа 3 та марказий ҳимоячи билан ҳаракат қилдими?

- Мен нимадан қўрқаман. Яна бир бор қайтараман. Бизда етарлича схемалар бор. 3-5-2, 3-4-3 бу ҳужумкор тактика. Лекин қайта айтаман, биринчи тайм бизда ҳеч нарса ўхшамади. Афсуски, биринчи бўлимда мудофаа вакиллари биз кутгандек ўйнамади. Бунинг сабаби нимада эканлигини тушунишга ҳаракат қиламиз. Иккинчи бўлимда тактикани ўзгартирдик ва ўйинимизда ҳам ўзгариш содир бўлди. 

- Таркибдаги йўқотишларнинг ўрнини қандай қоплайсиз? Алижоновнинг алмаштирилиши тактик қарормиди ёки унда жароҳат борми?

- У терма жамоа сафида 2 та ўйин ўтказди. Унда чарчоқ аломатлари бор. Олдинда 6 та учрашув бор. Ҳали ҳеч нарсани йўқотмадик, деб ҳисоблайман. Ўйин аввалида айтганимдек: ҳаммаси ўз қўлимиз, бошимиз ва оёғимизда. Мағлубиятга учрамай, ғалаба қозонишнинг имкони йўқ. 

- Турғунбоев иккинчи бўлимда чап қанотда винбек сифатида ҳаракат қилди. Унинг ўйинидан қониқиш ҳис қилдингизми?

- У ҳимоячи эмаслигини биламиз. Шундай бўлса-да, бу позицияда ўйнай олишига ишончим комил эди. Унда бу масалада амалиёт бор. Эътирозлар йўқ. Бироқ ундан ҳужумда яна ҳам фаол бўлишини кутгандим. 

Қайд этиш лозим, айни вақтда "шерлар" Ўзбекистон Суперлигаси турнир жадвалида 38 очко билан иккинчи ўринни банд этиб турибди. 41 очкоси бор "Насаф" пешқадам, 37 очко тўплашга эришган "Навбаҳор" эса 3-поғонада бормоқда.