"Малайзия - фаолиятимда янги босқич бошланишида трамплин бўлади" - "Нефтчи"дан кетиши, мураббий билан муносабати ва янги чақирув ҳақида

“Мавсум-2022”ни Фарғонанинг “Нефтчи” клубида ўтказган 26 ёшли ярим ҳимоячи Сирожиддин Қўзиев жамоасини ўзгартирди. У “Нефтчи” билан хайрлашиб, Малайзиянинг “Кучинг Сити” клубига кўчиб ўтди.

“Машъал”дан “Нефтчи” жамоасига таклиф қилинган Қўзиев якунига етган чемпионатда Суперлигада 20 та учрашувда рақиблар дарвозасига 5 та гол урди. Фаолиятида илк бор легионерга айланган ўйинчи Малайзия жамоаси билан келишувга эришгач, илк интервьюсини Sports.uz сайтига берди. Аввало, футболчи “Нефтчи”да ўтказган фаолияти хусусида гапирди.

- Биринчи даврада “Нефтчи”га анча мослаша олдим, - дея гап бошлади, Сирожиддин. - Натижани ҳам унчалик ёмон бўлди, деб айта олмайман. Ҳа, ҳаммасидан кўнглим тўлгани йўқ. Лекин, барибир чакки бўлмади. Иккинчи давранинг иккинчи туридан кейин жароҳат олиб, бир қатор учрашувларни ўтказиб юбордим. Билмадим, балки шундан кейин мураббийнинг менга нисбатан ишончи бироз пасайдими, натижада камроқ ўйин амалиётига эга бўлдим. Тўғрисини айтсам, кейинчалик кўнглим тўлмади.

- Сизни Илҳом Мўминжонов таклиф қилганди. Аммо у натижалар ўхшамагач кетди ва Левченко билан ишладингиз. Айтинг-чи, мазкур мутахассис билан қандай муносабатда эдингиз?

- Бош мураббий Виталий Левченко билан муносабатим яхши бўлган. Орамизда ҳеч қанақа келишмовчилик бўлгани йўқ.

- Мўминжонов пайтида нима учун натижалар кўнгилдагидек чиқмади?

- Биринчи давра бошида яхши таркиб йиғилганди. Кучли бешталикка кураша оладиган жамоа тўпланганди. Натижага келадиган бўлсак, менимча озроқ омад етишмади. Ютадиган бир қатор ўйинларимизда имкониятларни қўлдан чиқардик. Кўп очко оладиган учрашувларда омадсизликка учрадик. Балки қаердадир нимадир нотўғри кетган бўлиши мумкин. Футбола майда-чуйда нарсалар бўлмайди.

- Имкониятингиздан келиб чиқиб айтадиган бўлсак, бемалол легионер сифатида ўйнай олишингиз аниқ ва ўзингиз истагандек четга кетадиган бўлдингиз. Бу таклиф қандай юз берди?

- “Нефтчи” билан бир йиллик шартномам бўлишига қарамасдан менга Малайзиядан 100 фоизлик аниқ таклиф келиб тушди. Музокаралар олиб бордик ва биз бир тўхтамга келдик. “Кучинг Сити” жамоасига ўтганимдан хурсандман.

- Ҳар томонлама легионер сифатида тўп суришга тайёрман деб ҳисоблайсизми?

- Футболчи то фаолиятини тугатгунига қадар ўз устида ишлаши керак. Камчилик ҳаммада бўлади. Ўйинимни янада кучайтириш устида ишлайвераман ва янги даражага чиқишга ҳаракат қиламан. Ўйнаб кета оламанми-йўқми, деган гап ҳам бўлиши мумкин. Агар рақобатдан қўрқсангиз футболни йиғиштирган маъқул. Ҳар доим ҳар қандай жойга боришдан чўчимасдан таваккал қилиб кўравериш керак. Ўз кучингизга ишонсангиз ва меҳнат қилишда давом этсангиз ҳаммаси яхши бўлади.

- Асосий мақсадингиз қандай?

- Малайзия чемпионатини ўзимизни чемпионатдан кучли деб айта олмайман. Буни яширадиган жойим йўқ. У ерда яхши ўйинлар кўрсатиб, тажрибамни ошириб, кучлироқ чемпионатларга кетишга ҳаракат қиламан. Малайзия - фаолиятимда янги босқич бошланишида трамплин бўлади, деган мақсадда кетяпман. Шу ўринда мавсум давомида бизни қўллаб-қувватлаб келган фарғоналик мухлисларга раҳмат айтаман. “Нефтчи” жамоасига омад тилайман. Совринли ўринлар учун курашишининг тилакдошиман.

Шуҳратбек Жўраев.