"Манчестер Сити" Чемпионлар лигаси учун таркибини янгилади

"Манчестер Сити" клуби Европа Чемпионлар лигаси плей-офф босқичлари олдидан жамоа қайдномасига ўзгартиришлар киритди. Клуб расман Антуан Семеньо ва Марк Гехининг турнирнинг ҳал қилувчи учрашувлари учун рўйхатга қўшилганини эълон қилди.

Шу тариқа, Хосеп Гвардиола бошчилигидаги жамоанинг А рўйхати анча кучайди. Янгиланган таркибдан дарвозабонлар Доннарумма, Траффорд ва Беттинелли ўрин олди. Ҳимоя чизиғида Стоунз, Ҳусанов, Диас, Гехи, Гвардиол, Аке ва Айт-Нури каби футболчилар қайд этилган. Ярим ҳимояда Нунеш, Родри, Нико, Ковачич, Бернардо Силва, Рейндерс, Фоден, Шерки, Савиньо ва Доку жамланган. Ҳужум чизиғида эса Семеньо, Мармуш ва Холанд номлари бор.

Шунингдек, ёш футболчилардан ташкил топган Б рўйхатига Рико Льюис, Макс Аллейн ва Нико О’Райлли киритилган.

Маълумот учун, "шаҳарликлар" Чемпионлар лигасининг умумий гуруҳ босқичида 16 очко тўплаб, ТОП-8ликка киришни уддалади.