"Манчестер Сити" Леау учун жуда катта сумма таклиф қилмоқчи

"Манчестер Сити" бош мураббийи Хосеп Гвардиола жамоа ҳужум чизиғини кучайтиришни истамоқда. "Fichajes" нашри тарқатган маълумотга кўра, испаниялик мутахассис "Милан" винери Рафаэль Леауни ўз жамоасида кўришни хоҳламоқда.

Манбага кўра, "шаҳарликлар" 26 ёшли португалиялик футболчи учун 100 миллион евро атрофида таклиф тайёрламоқда. "Милан" Леау билан хайрлашишни истамаса-да, бундай йирик миқдордаги таклиф клуб раҳбариятини ўйлантириб қўйиши мумкин.

Леауни Гвардиола билан ишлаш имконияти ҳам қизиқтириши айтилмоқда. Леау "Милан" сафида 260 ўйин ўтказиб, 70 та гол урган ва 62 та голли узатма амалга оширган.