Манчестерликлар бешта ҳужумчини нишонга олди

Англия Премьер-лигасидаги мавқеини тиклашга уринаётган “Манчестер Юнайтед” таркибда жиддий ўзгаришларга қўл урмоқда. Бош мураббий Рубен Аморим учун олдинги чизиқни кучайтириш муҳим аҳамият касб этди.

Айни пайтда манчестерликларга кўп гол ура оладиган ҳужумчи керак. Чунки Премьер-лигадаги асосий рақобатчилардан бу типдаги тўпурарлар бор.

Хусусан, “Манчестер Сити”да Эрлинг Холанд тинимсиз гол уряпти, “Арсенал” швециялик Виктор Дьёкерешни олди, Уго Экитикени қўлга киритган “Ливерпуль” энди Александер Исаакни олишга ҳаракат қиляпти.

“Манчестер Юнайтед” мутасаддилари бешта тўпурарни нишонга олган. Рубен Аморим улардан бирини тезроқ жамоада кўришни истаяпти.

Англия матбуотининг ёзишича, манчестерликлар Бенжамин Шешко, Душан Влахович, Олли Уоткинс, Жан-Филипп Матета ва Николас Жексонга оғиз соляпти. Улар бу ўйинчилардан бирини янги чемпионат бошлангунга қадар ўз сафига қўшиб олмоқчи.