Манчестерликлар “Реал” кутаётган юлдуз билан музокара бошлади

“Реал” келаси ёзда “Ливерпуль” ҳимоячиси Трент Александр-Арнольдни эркин агент сифатида ўз сафига қўшиб олишни мўлжаллаган.

Бироқ “Манчестер Сити” мадридликларнинг режасини бузиши мумкин.

Caught Offside нашрининг ёзишича, “шаҳарликлар” 26 ёшли футболчига жиддий қизиқмоқда. Улар Трент жамоанинг 34 ёшли ҳимоячиси Кайл Уокерга муносиб ўринбосар бўлади, деган фикрни илгари суряпти.

Манбага кўра, “Манчестер Сити” мутасаддилари Трентнинг агентлари билан боғланган ва ҳамкорлик бўйича дастлабки музокараларни бошлаб юборган.

“Ливерпуль” билан ёзда шартномаси тугайдиган ўйинчига “Барселона” ҳам кўз тикмоқда. Мерсисайдликлар ҳам ўз тарбияланувчиси билан ҳамкорликни узайтириш бўйича келишишга уриняпти. Бироқ Трент уларнинг таклифини қабул қилгани йўқ.