Maoshing ikki baravar oshadi, ketib qolmasang bo‘ldi!

Bundesliga chempioni “Bavariya” klubi rahbariyati qanot hujumchisi Maykl Olisening kelajagi haqidagi turli taxminlarga chek qo‘yishni istamoqda.

Shu sababli myunxenliklar futbolchi bilan shartnomani 2031 yilgacha uzaytirish va uning maoshini deyarli ikki baravar oshirish niyatida.

Bu haqida Bayern & Germany akkaunti L'Équipe maʼlumotlariga tayanib xabar berdi.

Manbaga koʻra, yangi shartnoma imzolangan taqdirda 24 yoshli vinger klubning eng koʻp maosh oluvchi futbolchilaridan biriga aylanadi. Hozirgi shartnoma 2029 yilgacha amal qiladi.

OAV maʼlumotlarida aytilishicha, fransuz futbolchisi ayni paytda yiliga 16–17 million yevro maosh olmoqda.

O‘tgan mavsumda Olise barcha musobaqalarda 52 ta oʻyinda qatnashib, 22 ta gol va 31 ta golli uzatma muallifi boʻldi.

Transfermarkt maʼlumotiga koʻra, futbolchining bozor qiymati 150 million yevroni tashkil etadi. Uning narxi oʻta baland ekaniga qaramay, Yevropaning bir necha klublari Oliseni oʻz safiga chorlmoqda.