Martines: "Messi biz uchun doimo namuna bo‘lib qoladi"

"Inter" klubi va Argentina terma jamoasi hujumchisi Lautaro Martines Lionel Messi haqida fikr bildirdi.

38 yoshli hujumchi ikkita gol urib, jamoasining Jahon chempionati saralash bosqichida Venesuelani 3:0 hisobida mag‘lub etishiga hissa qo‘shdi.

- Bu kecha juda ta’sirli bo‘ldi va bizning xotiramizda qoladi, sababi u Leo uchun alohida ahamiyatga ega. Messi biz uchun doimo namuna bo‘lib qoladi. Men unga terma jamoamiz va butun futbol uchun qilgan hamma ishi uchun minnatdorman, - deya Lautaroning so‘zlarini keltirdi Argentina terma jamoasi matbuot xizmati.

Lionel Messi Argentina terma jamoasidagi debyutini 2005 yilda o‘tkazgan bo‘lib, u jamoa safida jami 194 o‘yinda 114 ta gol urgan.