Машҳур футболчи қимор ўйнаганини тан олди

“Ювентус” ярим ҳимоячиси Николо Фаджоли терговчиларга футбол учрашувларига пул тикканини тан олди.

Италия қонунчилигига кўра, спортчилар ўзлари шуғулланаётган спорт турларига пул тикиши тақиқланган.

Corriere della Sera нашрининг ёзишича, Фаджолининг адвокатлари жазони енгиллаштириш мақсадида, футболчи ўзи ўйнаган жамоалар иштирокидаги учрашувларга пул тикмаганини таъкидламоқда. Бундан ташқари, адвокатлар мижози ўсмирлар давридан покерга муккасидан кетганини ва бу орқали унда қимор ўйинларига қарамлик юзага келганини рўкач қиляпти.

Эслатиб ўтамиз, аввалроқ Фаджолининг ноқонуний тарзда футбол учрашувларга пул тиккани ҳақида маълумотлар тарқатилган эди. Кейин тафтишчилар унинг профилларига киришга рухсат олиб, текширув ўтказди.

Агар Фаджоли айбдор, деб топилса, уч йил ва ундан узоқ муддатга футболдан четлатилиши ва унга нисбатан жарима қўлланилиши мумкин.