Машҳур ҳужумчи яна Винисиуснинг “пўстагини қоқди”

“Реал”нинг бразилиялик легионери Винисиус Жуниор яна танқидларга нишон бўлмоқда. “Арсенал” ва “Барселона”да ўйнаган машҳур ҳужумчи Тьерри Анри 24 ёшли футболчининг Чемпионлар лигасида “Ливерпуль” билан ўйиндаги ҳаракатларига эътироз билдирди.

 - Винисиус нега “Ливерпуль”нинг қанот ҳимоячисига босим ўтказамаганини ҳеч тушуна олмадим. Вазиятга қараб борича ўйнаш керак.

Винисиус Конор Брэдлини бошида беш-олти дақиқа прессинг қилди ва кейин қанотни рақиб ихтиёрига бериб қўйди.

Нега бундай қиласан? Нега рақибга ҳудудларни очиб беряпсан? Унга босим ўтказ, сариқ карточка олишга мажбур бўлсин, ана ўшанда унинг ҳимояси бўшашади ва самараси пасаяди. Лекин Винисиус бундай қилмайди, - деди Тьерри Анри.

Европа Чемпионлар лигаси умумий босқич тўртинчи турида “Ливерпуль” футболчилари “Реал” жамоаси устидан 1:0 ҳисобида зафар қучди. Ягона ғалаба тўпини Алексис Мак Аллистер киритди.