Маскерано амалдор бўлади

"Барселона" ва "Ливерпуль" клубларининг собиқ ярим ҳимоячиси Хавьер Маскерано Аргентина футбол ассоциациясида иш бошлайди.

2020 йил ноябрь ойида бутсаларини михга илган 36 ёшли Маскерано терма жамоаларнинг методикаси ва ривожланиши бўлимида ишлайди, дея хабар бермоқда терма жамоа матбуот хизмати.

Бўлимнинг асосий вазифаси Аргентинанинг барча ёшдаги терма жамоалари асосий таркиб билан бир хил концепцияда ривожланиб боришини назорат қилишдан иборат.

Маълумот учун, Маскерано айни дамда Аргентина терма жамоасида энг кўп ўйин ўтказган футболчи ҳисобланади. У альбасетлар таркибида жами 147 та ўйинда иштирок этган.