"Майдонда мураббийни эмас, бировларнинг кўрсатмаларини бажарадиган футболчилардан кўра, ёшлар минг марта афзал" ёхуд Алиқуловга ҳам келишилган ўйинларда қатнашиш таклиф қилинганми?

“Шўртан” жамоасидаги муаммолар ҳали ҳам тугамаган кўринади. Куни кеча клубнинг бир қатор ўйинчилари келишилган ўйинлар ҳамда тотализаторда иштирок этганликлари учун дисквалификация қилинди.

Шунингдек, охирги пайтларда жамоа бош мураббийи Асрор Алиқулов ҳам “Шўртан” билан бирга эмасди ва бу ҳолат ҳам турли гап-сўзларга сабаб бўлди, дейиш мумкин. Клуб эса про-лигада ҳали ғалаба нималигини билмай келяпти.

Sports.uz мухбири ушбу мутахассис билан боғланиб бир қатор масалаларга ойдинлик киритди.

- Асрор Чориевич, охирги пайтларда “Шўртан” клуби билан бирга эмасдингиз. Сизни даволанаётганингиз ҳақида ҳам ёки кетганингиз хусусида ҳам эшитгандек бўлдик. Бу борада аниқ маълумот берсангиз...

- Футболчилик пайтимда олган жароҳатлар туфайли вақти-вақти билан даволаниб турардим. “Шўртан”да ишлаётганимда бунинг учун вақт топа олмаётгандим. Тўғриси, жамоамизда юз берган ҳолатлар ҳам менга руҳий томонлама таъсир кўрсатди. Кубок ўйинлари “Шўртан” учун унчалик муҳим бўлмаганлиги боис шу вақтдан унумли фойдаланиб даволанишни лозим топдим, бунинг учун раҳбариятдан рухсат олдим. Мана, соғлигимни тикладим ва клубга қайтганимга 10 кундан ошди.

- Чемпионат ўртасида даволанишни олдиндан режалаштирганмисиз?

- Ҳозир айтганимдек, аввало Кубок туфайли чемпионатдаги танаффус ва клубдаги ишларнинг менга таъсири бўлди, бош оғриқлар кўпайди. Ўзимда руҳий томонлама ҳам чарчоқ сезгандим. Футболчилик давримда бошимдан ҳам жароҳатлар олгандим. Кейинчалик бунинг асоратлари бўлмаслиги учун ҳам даволаниб туришим керак. Мана шу ҳолатда клуб раҳбаридан рухсат олиб Тошкентда даволандим.

- Ҳозир соғлигингиз қандай?

- Яхши. 10 кундан бери жамоадаман. “Оқ-тепа” билан ўйинга тайёрландик ва бу жамоага қарши дуранг ўйнадик. “Шўртан”га 2003 йилда туғилган олти нафар ёшларни таклиф қилдик. Айрим ўйинчиларимизни олти ой ва яна айримларини бир йилга футболдан четлаштиришди.

- Сиздан шу ҳақида ҳам сўрамоқчи эдим. Тотализатор, келишилган ўйинларга алоқадорлиги аниқланган футболчилар дисквалификацияга учради. Бу хабар сизни қандай аҳволга солиб қўйди?

- Кутилмаган ҳолат, жуда. “Шўртан” раҳбарлари, ҳомийлари қарздорликларни ёпиш учун енг шимариб ишлашяпти. Бу ёқда эса айрим футболчиларнинг бундай йўл тутишгани ҳаммамизни карахт ҳолатга тушириб қўйди. Кутмагандик! Клуб қандай аҳволда эди-ю ва уни тиклаш учун қанчадан-қанча инсонлар жон куйдираётган бир пайтда футболчиларнинг ўзини бундай тутишини қандай тушуниш мумкин? Ҳаммамизни саросимага солди. Буни эшитганимизда жуда оғир аҳволга тушиб қолдик.

- “Шўртан” футболчиларининг қинғир ўйинларга аралашишлари жамоадаги молиявий муаммоларга бориб тақаладими ёки бошқа сабабми? Бу борада клубнинг ички ҳолатида текширув ва суриштирув ишлари олиб борилдими?

- Бу жуда оғриқли масала. 2019 йилда “Шўртан” кўплаб шубҳали ўйинларни ўтказган. 2020 йилда жамоага келганимиздан кейин вазиятни тартибга солиш, ҳалол футбол ўйнаш каби ҳолатлар бўйича ЎФА томонидан ҳам огоҳлантириш берилган, бизга. Раҳбарлар билан ҳаммасини келишиб, яхши жамоа тузиш, соғлом рақобатни вужудга келтириш мақсадида бу ерда иш бошлагандик. ФИФАнинг таъқиқи туфайли янги ўйинчиларни ололмадик, бизни чегаралаб қўйди. Футболчиларни танлаб ола билмадик. Ихтиёримиздаги бор ўйинчилар билан ўйнашга мажбур бўлдик. Клуб молиявий қийинчиликдан чиқиб кетиш учун қайсидир томондан иқтисод қилишга мажбур эди. Мисол учун футболчиларга катта пуллар йўқ эди. Йил бошида ўйинчилар билан гаплашилганида улар бор шароитга кўнишган ва шунга қараб шартнома имзоланган. Ўйинчиларнинг бундай иш қилишларида кўпроқ ўзлари айбдор. Клубда олаётган ойлик маошларини бунга сабаб қилиб кўрсатиш керак эмас. Энг оғриқлиги бундай ишга маҳаллий футболчилар қўл уришган.

- Яқинда “Шўртан” қарздорликларни бартараф қилгани учун ФИФА таъқиқни олиб ташлаганди ва яна умид учқунлари пайдо бўлган. Биринчи даврадан кейин қандай режалар бор? Янги ўйинчилар билан музокаралар бошланганми ёки ҳали ҳам тўсиқлар мавжудми?

-  Ҳеч қанача тўсиқ йўқ. Жамоамиздан кетган олтита футболчи ўрнига боя айтганимдек, 2003 йилда туғилган ёшларни таклиф қилдик ва уларни рўйхатдан ўтказдик. “Оқ-тепа” билан учрашувда аксарияти дебют ўйинини ўтказдилар.  

- Ростини айтинг-чи, сизга келишилган ўйинларда қатнашиш таклифи билан чиқишганми?

- Тотализатор ўйинларида иштирок этмаганман, келишилган ўйинларда ҳам.

- “Шўртан” ҳамон мавсумни ғалабасиз ўтказяпти. Бунинг чораси борми? Жамоани сақлаб қолиш учун режалар қандай?

- Жамоани кучайтириш учун ҳаракат қиляпмиз. Майдонга чиқиб мураббийларнинг эмас, бошқа бировларнинг кўрсатмаларини бажарадиган футболчидан кўра, яхшиси, ёшларнинг ўйнагани мураббий учун минг марта афзал. 18 ёшли ўйинчилар орасидан иқтидорлилари бор ва уларни тарбия қила оламиз. Вазиятни ўнглаш учун охиригача курашамиз.

- Клубдаги бундай вазиятлардан кейин кетиш ҳақида ўйламаяпсизми?

- Тўғриси, қийин. Йил охиригача шартномам бор. Ўша шартномани раҳбарият олдида 100 фоиз бажаришимиз керак. Энди имкониятимиздан ортиқроқ даражада ҳаракат қилишимиз лозим. Аммо қийин аҳволдамиз. Барибир қўлдан келганича ҳаракат қиламиз.