Майдондан ҳайдалиб ҳам рекорд ўрнатиш мумкин экан

Европа Чемпионлар лигасининг нимчорак финал дастлабки учрашувида “Барселона” Португалияда “Бенфика” меҳмони бўлиб, сафардан 1:0 ҳисобидаги ғалаба билан қайтди.

Бироқ каталонияликларга ғалаба қозониш осон бўлгани йўқ. Ҳимоячи Пау Кубарси 22-дақиқадаёқ қизил карточка олди.

Қизиғи шундаки, бу ҳолат Пау Кубарсининг номини тарихга ёзди. У XXI асрда Чемпионлар лигаси учрашувида майдондан четлатилган энг ёш футболчи бўлди. Ўйин куни Кубарси 18 ёшу  42 кунлик эди.

Қолверса, бу “Барселона” асосий жамоасида 65 та учрашув ўтказган ёш футболчининг фаолиятидаги биринчи қизил карточка бўлди.

Европа Чемпионлар лигаси тарихида майдондан четлатилган энг ёш ўйинчи нигериялик Селестин Бабаяро ҳисобланади. У 1994 йили “Андерлехт” сафида ўйнаб, қизил карточка олганида 16 ёшу 86 кунлик эди.