Мбаппе: Пулимни бермаса, ПСЖ Чемпионлар лигасидан қувилади

“Реал” ҳужумчиси Килиан Мбаппе “Пари Сен-Жермен”дан клубдан қолиб кетган маошини ундириш ҳаракатларини тўхтатгани йўқ.

Парижликлар умумий ҳисобда Килиандан 55 миллион евро миқдорида қарз. Футболчи клубни судга бериб, пулни тўлаш ҳақида ҳам қарор чиқартирган. Франция футбол федерацияси Тартиб-интизом қўмитаси ҳам ПСЖдан ўйинчининг ҳақини беришни талаб қилмоқда.

Парижликлар суд қарорини ҳам, қўмита талабини ҳам бажармоқчи эмас.

Sport.es сайтининг маълум қилишича, Мбаппе энди УЕФАни ишга солмоқчи. 26 ёшли тўпурар халқаро ташкилотдан агар ПСЖ маошнинг қолган қисмини тўламайдиган бўлса, клубни Европа Чемпионлар лигаси учун берилган лицензиядан маҳрум қилишни сўрамоқчи.

Маълумот ўрнида айтиш мумкинки, Мбаппенинг ПСЖ билан маош масаласидаги зиддияти бўйича таниқли адвокат Дельфин Верхейден иш юритмоқда.