Мбаппе Тчуамени ва Вальверде жанжалидан қочиб қутилди

Мадриднинг “Реал” жамоаси франциялик ҳужумчиси Килиан Мбаппе жамоа ичидаги навбатдаги можародан кейин яна ҳамманинг диққат марказига тушди.

Испаниянинг нуфузли Sport нашри ёзишича, Орельен Тчуамени ва Федерико Вальверде ўртасида можаро юз берган Вальдебебасдаги машғулотдан кейин Мбаппе клуб базасини яхши кайфиятда тарк этган. Камералар Мбаппенинг машғулот маркази ҳудудидан чиқиб кетаётганда машина ичида кулиб ўтирганини тасвирга олган.

Қайд этилишича, бу ҳолат мадридликлар ичидаги таранг муҳит фонида фаол муҳокамаларга сабаб бўлган. Аввалроқ Тчуамени ва Вальверде ўртасидаги навбатдаги тўқнашувдан кейин клуб раҳбарияти шошилинч жамоа йиғилишини ташкил қилгани хабар қилинган эди.

Манба маълумотига кўра, Мбаппе жамоавий учрашувдан кейин базани биринчи бўлиб тарк этган футболчилардан бири бўлди. Хабар қилинишича, Килиан тиббий кўрикдан ўтган ва «Барселона»га қарши ўйинда майдонга қайтишга яқин турибди.

Шунингдек, испан ОАВ Мбаппе Франция терма жамоасидаги фаолиятидан буён Тчуамени билан яхши муносабатда эканини таъкидламоқда. Аввалроқ матбуотда ҳар икки футболчи Дидье Дешамнинг мадридликлар бош мураббийи этиб тайинланиши эҳтимолига ижобий қараши ҳақида маълумотлар чиққан эди.

Бундан ташқари, сўнгги кунларда Мбаппе жамоа учун муҳим бўлган мавсум палласида Италияга саёҳати сабаб мухлислар ва ОАВ танқидига учраган эди.