Мбаппе ва бошқалар "Олтин тўп"нинг яқин келажакдаги ворисларими?

Индивидуал совринлар орасида энг нуфузлиси ҳисобланадиган «Олтин тўп»ни қўлга киритишни истамаган футболчини кундузи чироқ ёқиб ҳам топиб бўлмаса керак. Ўз навбатида қуйидаги материалда ёш истеъдод эгалари орасида яқин келажакда «Олтин тўп»га даъвогарлик қила оладиганлари ҳақида сўз боради.

Килиан Мбаппе

Шак-шубҳасиз, энг муносиб номзод. Бежизга Килиан Мбаппени Лионель Месси ва Криштиану Роналдунинг вориси сифатида эътироф қилмайдилар. Чунки унда мегаюлдуз даражасига кўтарилиш учун ҳамма нарса бор. Боз устига франциялик  ёш иқтидор эгаси шундоқ ҳам охирги йилларда катта ўсишга эришиб, жамоавий ва индивидуал совринлардан анчасини коллекциясига қўшиб қўя олди. Айтиш мумкин бўлса, ўша коллекцияга энди «Олтин тўп» етишмаяпти холос. Дарвоқе, у ёшлигида Роналдунинг мухлиси бўлганлигини ҳам таъкидлаш жоиз.

Мартин Эдегор

Эндиликда Эдегор Ла Лигада «Реал Сосьедад» учун майдонга тушган ҳолда чиндан ҳам иқтидорли эканлигини исботлаб бермоқда. Айтишларича, мадридликлар жорий мавсум ниҳоясига етганидан кейин уни сан-себастьянликлардан қайтариб олмоқчилар. Боз устига Мартиннинг трансфер ҳуқуқи ҳамон «Реал»га тегишли. Агар у пойтахт суперклубида ҳам зўр ўйнаб кета олса, бемалол «Олтин тўп»га даъвогарлик қилиши мумкин.

Федерико Вальверде

Уругвайлик 21 ёшли ярим ҳимоячи жорий мавсумнинг ҳақиқий кашфиётларидан бири бўлди, дейиш учун асослар етарли. Нега деганда, Федерико Вальверде Зинедин Зиданга «Реал»нинг бошланғич таркибида тўп суришга муносиб эканлигини исботлаб бера олди. Агар жанубий америкалик ёш истеъдод эгаси бундан кейин ҳам маҳоратини чархлаб шу руҳда давом этадиган бўлса, бемалол индивидуал совринларнинг энг нуфузлиси сифатида тилга олинадиган «Олтин тўп»га даъвогарлик қилиши мумкин.

Френки де Йонг

Нидерланд футболи ҳар доим зўр ўйинчилари билан фахрланиб келган. Бугунги авлод вакиллари орасида ҳам келажаги порлоқ ёшлар талайгина топилади. Мана шундай истиқболли ўйинчилардан бири Френки де Йонгдир. Бекорга уни «Барселона» раҳбарияти катта пул эвазига сотиб олмаган. Эътиборлиси, ўтган мавсум «Аякс» таркибида порлаган ва клубнинг чемпионлар лигасида ярим финалгача етиб келишида асосий роллардан бирини ижро этган де Йонг «Барса»да ҳам ўз ўрнини топа олди. Шунинг эвазига ўтган мавсум якунига кўра Френкини ҳам «Олтин тўп-2019» даъвогарлари сафига жойлаштиргандилар. Биласиз, ўша сўровда нидерландиялик футболчи 11-ўрин билан кифояланган бўлса, бош соврин унинг клубдоши Лионель Мессига насиб этганди. Муҳими, «Лолалар юрти» вакили ҳали анча ёш ва унда «Олтин тўп»ни қўлга киритиш учун етарлича вақт бор. Энг қизиғи, 22 ёшли бу ижрочи ўзини индивидуал совринлардан кўра жамоавий ютуқлар кўпроқ қизиқтиришини айтиб келади.

Эрлинг Холанд

Норвегиялик бу ҳужумчи ҳақида батафсил тўхталиш шарт бўлмаса керак. Зеро, шундоқ ҳам жорий мавсум давомида Эрлинг Холанд ҳақида ёзилмаган, унинг голлари муҳрланган видеолавҳаларни намойиш этилмаган ОАВ қолмади ҳисоб. Айниқса, 19 ёшли футболчи «Зальцбург»дан Дортмунднинг «Боруссия» клубига кўчиб ўтганидан сўнг янги иш жойида жуда зўр старт олди ва бундеслигада бир қанча рекордларни ўрнатди. Шунинг учун бўлса керак, Холанднинг бундан кейин ҳам «Қовоғарилар» сафида кўпроқ ушланиб қолишига ҳеч ким ишонмаяпти. Негаки, ҳужумчини қўлга киритиш учун қитъадаги манаман деган грандлар аллақачон ўзаро баҳслашишни бошлаб юборганлар. Албатта, аксар ишқибозлар бу ҳужумчи ўз вақтида Рой Киннинг оёғини синдирган Альф-Инге Холанднинг ўғли ҳисобланишини билсалар керак. Эслатиш керакки, кейинчалик Кин катта Холанддан аёвсиз равишда қасос олгани боис у катта футболдан кетишга мажбур бўлган.

Жоау Фелиш

Португалиялик футболчилар орасида энг қиммати саналадиган Жоау Фелиш бундай мақомга муносиб эканлигини исботлаб келмоқда. Биласиз, ўтган мавсум «Бенфика»даги дебют мавсумида барчани ўзи ҳақида гапиришга мажбур қила олган Жоау Фелишни «Атлетико» раҳбарияти 126 миллион евро (!) тўлаш эвазига сотиб олган. Тўғри, ёш иқтидор эгасининг янги клубдаги ишлари дастлаб силлиқ кечмади ва бунинг учун унга маълум вақт керак бўлди. Фелиш «Матрасчилар» жамоасининг бошланғич таркибидан муқим жой олишга муваффақ бўлган маҳалда эса коронавирус билан боғлиқ муаммо бошланиб кетди... Нима бўлган тақдирда ҳам экспертлар Роналдунинг вориси сифатида тилга олинаётган ушбу ижрочининг яқин бир неча йил ичида бемалол «Олтин тўп» учун кураша олишига  шубҳа қилмаяптилар. Соҳа мутахассислари эса билмаса гапирмайдилар.

Кристиан Пулишич

Америкалик футболчилар орасида бирортаси «Олтин тўп»га яққол даъвогарлик қила олмаганини ҳамма яхши билса керак. Бироқ яқин йиллар ичида Кристиан Пулишич бемалол мана шундай бўшлиқ ўрнини тўлдира олиши мумкин. Қолаверса, «Челси» мутасаддилари бекорга уни «Боруссия» (Д)дан сотиб олиш учун 65 миллион евро тўлашга рози бўлмаганлар. Эътиборлиси, Пулишич ҳали 22 ёшга ҳам тўлмаган, аммо у клуб ва терма жамоа миқёсида аллақачон асосий таркибдан жой олишга муваффақ бўлган. Бунақаси ҳар доим кузатилавермайди, тўғрими?

Родриго Эрнандес

«Атлетико» академиясида тарбияланган ва мухлислар «Родри» деб чақиришни ёқтирадиган ушбу футболчининг ҳам истиқболи порлоқ эканлигига ҳеч кимда шубҳа йўқ. Акс ҳолда Пеп Гвардиоладек машҳур мураббийнинг ўзи «Сити» тепасида турганлардан уни сотиб олиш кераклигини сўрамаган бўларди. Тўғри, Родриго Эрнандес худди Килиан Мбаппе ё Жоау Фелиш каби ҳамма танийдиган футболчига айланишга улгурганича йўқ. Аммо унинг иқтидор масаласида улардан асло қолишмаслигига ҳеч қандай шубҳа йўқ.

Фабиан Руис

«Бетис» академиясида тарбияланган испаниялик 23 ёшли ушбу футболчида ҳам катта иқтидор бор. Буни шундан ҳам билиб олиш мумкинки, «Наполи»да кўрсатаётган зўр ўйини туфайли энди уни қўлга киритиш учун «Барселона», «Реал» ва бошқа элит-лигалардаги град клублар курашни бошлаб юборганлар. Ҳали расман тасдиқланмаган ва асосан мухлислар орасида юрган миш-мишларга қараганда, ёзги трансфер чоғида «Қироллик клуби» раҳбарияти Руис учун 70 миллион евродан воз кечиши мумкин. Энг асосийси, экспертлар ва ишқибозлар Фабиандан супермақомдаги футболчи чиқишига ишонадилар.

Маркус Рэшфорд

Англия терма жамоаси ва «МЮ» клубининг 22 ёшли ҳужумчисининг яқин йиллар ичида «Олтин тўп» учун яққол кураша олишига ҳеч ким шубҳаланмаяпти ва бунинг учун асослар етарли. Чунки Рэшфорд охирги йилларда катта ўсишга эришиб, барқарор даражада ўйнай олишини исботлаб бўлган. Бахтга қарши жорий йил аввалида олинган оғир жароҳат туфайли Маркусда кутилмаган муаммолар юзага келди. Буни қарангки, унинг сафга қайтиши кутилаётган маҳалда коронавирус хавфи туфайли ўйинлар тўхтатилди.

Жанлуижи Доннарумма

Италиялик ёш йигитнинг Лев Яшиндан сўнг «Олтин тўп»га эга чиққан иккинчи дарвозабонга айлана олиши мумкинлигига ишонаётганлар ҳам йўқ эмас. Бироқ бунинг эҳтимоли унчалик юқори эмаслигини ҳам қўшимча қилиш керак.