Мбаппени “Реал”дан ҳайдашни талаб қилаётганлар 40 миллиондан ошди

Франциялик машҳур ҳужумчи Килиан Мбаппенинг “Реал” клубидан кетишини талаб қилувчи петицияни имзолаганлар сони 40 миллиондан ошди, деб хабар бермоқда ESPN.

Қизиғи шундаки, икки кун аввал имзолар сони атиги 11 миллион эди.

Аввалроқ, Килиан жамоадаги айрим шерикларининг, хусусан Винисиус Жуниорнинг хатти-ҳаракатларидан норози экани ҳақида хабар берилганди.

Футболчининг ўзи Испания чемпионатининг 35-турида “Барселона”га қарши ўйин олдидан Италияга дам олишга кетган ва шундан кейин мухлислар танқидига учраган.

“Барселона”га қарши баҳс 10 май куни бўлиб ўтади ва “эл-класико” ҳар икки жамоа учун мавсумнинг энг муҳим тўқнашуви ҳисобланади.

Буларнинг барчаси клубдаги беқарорлик фонида юз бермоқда, жумладан жамоа ечиниш хонасида ярим ҳимоячилар Федерико Вальверде ва Орельен Тчуамени ўртасида муштлашув содир бўлган, натижада Федерико бош мия жароҳатини олган.

27 ёшли Килиан Мбаппе 2024 йилдан буён “Реал” сафида ўйнамоқда. Унинг аввалги клуби Франциянинг ПСЖ жамоаси бўлган.

Ушбу мавсумда Мбаппе барча мусобақаларда 41 та ўйинда 41 та гол ва 6 та голли узатма амалга оширган. Умуман олганда, унинг Мадрид клуби сафидаги 100 та ўйинда 85 та гол ва 11 та голли узатмаси бор.