Мбаппенинг жароҳати ҳақида гапи хавотирли чиқди

Европа Чемпионлар лигаси умумий босқичининг олтинчи турида “Реал” Бергамода мезбон жамоа “Аталанта”ни 3:2 ҳисобида мағлуб этиб қайтди.

Учрашувда ҳисобни очган Килиан Мбаппе 36-дақиқада жароҳат туфайли майдонни тарк этди.

Беллашувдан кейин 25 ёшли франциялик ҳужумчи жароҳати ҳақидаги саволга жавоб берди.

- Жароҳатим жиддийми ёки йўқ, бу ҳақида тасаввурга эга эмас. Ҳаммаси яхши бўлишидан умидворман.

Мана энди “Реал”даги ишларим рисоладагидек кетмоқда. Чунки бу “Реал”. Мен бу ерга ғалабаларга ҳисса қўшгани ва жамоага ёрдам бергани келганман. Бу галги учрашувда ҳаммамиз жуда яхши ҳаракат қилдик, - деди Килиан Мбаппе.

Мбаппе жорий мавсумда барча турнирларда 21 та учрашувда қатнашиб, 11 та гол ва иккита ассист муаллифи бўлди.