Мбаппенинг тарихий рекордини "Сити" футболчиси такрорлади

"Манчестер Сити" ярим ҳимоячиси Фил Фоден ПСЖ ҳужумчиси Килиан Мбаппенинг УЕФА Чемпионлар лигасида ўрнатган тарихий рекордини такрорлади.

Англиялик футболчи ЕЧЛнинг чорак финалидан ўрин олган “Боруссия” Дортмундга қарши ҳар иккала ўйинда ҳам ўз ҳисобига гол ёздириб қўйишга эришди.

Goal нашри тарқатган хабарга қараганда, Мбаппе 2016/17 йилги мавсумда Чемпионлар лигаси чорак финалининг ҳар иккала баҳсида ҳам гол урган ва 21 ёшгача бўлган футболчилар орасида ушбу ишни илк бор уддалаган. Франциялик ҳужумчи ўшанда 18 ёшда бўлган. Фоден эса ҳозир 20 ёшда.

Фил жорий мавсум “Манчестер Сити” сафида жами 37 та ўйинда майдонга тушди ва ўз ҳисобига 12 та голга муаллифлик қилди.

“Манчестер Сити” ярим финалда ПСЖга қарши кураш олиб боради. Ушбу жамоаларнинг дастлабки ўйини 27 апрель куни Парижда, жавоб баҳси 4 май куни Манчестерда бўлиб ўтади.