Ван Дейк Ўзбекистонга қарши ўйиндан кейин ижобий фикрлари билан ҳайратда қолдирди

Нидерландия терма жамоаси Жаҳон чемпионати олдидан ўтказилган ўртоқлик учрашувида Ўзбекистонни 2:1 ҳисобида мағлуб этди. Ғалаба қозонилганига қарамай, учрашувдан кейин жамоа сардори Виржил ван Дейкнинг фикрлари Нидерландияда баҳс-мунозараларга сабаб бўлди.

"Бу натижа бизга турнир олдидан яхши кайфият улашади", — деди ҳимоячи NOS телеканалига берган интервьюсида.

Ван Дейкнинг таъкидлашича, мазкур баҳс футболчилар учун Жаҳон чемпионатида Японияга қарши ўтадиган илк ўйин олдидан маҳаллий шароитларга мослашиш имконини берган.

"Кўриниб турибдики, биз ҳали бу шароитларга тўлиқ кўникиб улгурмадик. Майдон тез қуриб қолди ва бундай вазиятда ўйнаш қийинлашади."

Сардор учрашувдан ижобий жиҳатларни излашга ҳаракат қилди.

"Биринчи бўлимда яхши вазиятлар яратдик. Бу ўтган ҳафта Жазоирга қарши ўйинни эслатди. Ўшанда ҳам имкониятлар бўлган, аммо гол ура олмаган эдик ва 0:1 ҳисобида ютқаздик."

Бироқ Ван Дейкнинг бу фикрлари студиядаги эксперт Пьер ван Ҳойдонкни ҳайратда қолдирди. Унинг фикрича, жамоа сардори танқидийроқ чиқиш қилиши керак эди.

"Мен Ван Дейкни ажойиб сардор ва футболчи деб ҳисоблайман. Аммо шундай вазиятлар бўладики, сен жамоа кўрсатган ўйинга баҳо беришинг ва бироз қаттиқроқ муносабат билдиришинг керак. Ўйин сифати бўйича озгина бўлса ҳам норозилик ва асабийлик кўрсатиш лозим эди", — деди ван Ҳойдонк.

Маълумот учун, Нидерландия Ўзбекистон устидан қозонган 2:1 ҳисобидаги ғалабадан сўнг Жаҳон чемпионати олдидан сўнгги тайёргарлик босқичини якунлади.