Мен Пересни ҳам, Мбаппени ҳам биламан. “Реал” трансфери амалга ошмайди!

Қишки трансферлар вақтида Италия чемпионати иштирокчиси “Сампдория” сафига қўшилган  испаниялик ярим ҳимоячи Хесе Родригес ПСЖ ҳужумчиси Килиан Мбаппенинг “Реал”га ўтиши ҳақидаги хабарларга муносабат билдирди.

Хесе Родригес “Реал” тарбияланувчиси ҳисобланади. Ҳужумкор футболчи бир неча мавсумни Мадрид клубида ўтказганидан кейин ПСЖда ҳам тўп тепган.

- Мбаппенинг Мадридга келиши амалга ошадими? Бунга аниқ жавоб бериш қийин. Мен “Реал” президенти Флорентино Пересни яхши биламан. Ўтган галги воқеадан кейин бу трансфер амалга ошмаса керак. Чунки Мбаппенинг қилиғи унга ёқмаган.

Агар мен клуб президенти ёки хўжайини бўлсам, Мбаппе масаласини ҳал қилиш учун қўл остимдаги футболчилар ва трансфер бозоридаги вазиятни инобатга олардим. Агар иқтидор нуқтаи назаридан ўйинчи танлаш керак бўлса, кўзимни юмган ҳолда Килианни олардим, - деди Хесе Родригес.

Килиан Мбаппенинг парижликлар билан шартномаси 2025 йилнинг ёзигача тузилган. Бироқ, янги шартнома имзоланганидан бери 24 ёшли ҳужумчининг ПСЖдан кетиши муҳокама қилинади.