Мендеш “Реал” юлдузини “Барса”га жойламоқчи

“Барселона” ўз сафига ашаддий рақиб – “Реал” ярим ҳимоячиси Марко Асенсиони қўшиб олмоқчи.

27 ёшли футболчининг мадридликлар билан амалдаги шартномаси мавсум охирида якунланади. Diario Sport нашрининг маълум қилишича,  каталонияликлар ёзда уни эркин агент мақомида жамоага қўшиш учун ҳозирдан унинг агенти Жорже Мендеш билан музокара олиб бормоқда.

Аслида Жорже Мендешнинг ўзи мижози хизматларини Англия Премьер-лигасининг бир неча клублари қаторида “Барселона”га ҳам таклиф қилганди.

Манбаларнинг таъкидлашича, “Барса” президенти Жоан Лапорта билан дўстона алоқага эгалигидан фойдаланиб, Жорже Мендеш Асенсиони Каталония клубига жойлашга ҳаракат қилмоқда.

“Реал” ҳам ўз футболчини олиб қолиш мақсадида унга янги шартнома берган. Бироқ, унда кўрсатилган шартлар Асенсиога маъқул келгани йўқ.