Месси анча қийналиб қолибди

Бундан кейинги фаолиятини “Интер Майами” жамоасида давом эттирадиган Лионель Месси икки йил муқаддам нега ПСЖга кўчиб ўтганига изоҳ берди.

- Мен ПСЖга бу клубни ёқтирганим, у ерда дўстларим ва аввал менинг йўлим кесишган танишларим бўлгани учун кўчиб ўтгандим. Бу жамоага мослашишим осон кечади, деб ўйловдим. Шу боис, Париж клубини танладим.

Ҳақиқат шуки, мослашиш жараёни мен кутганимдан анча қийин кечди. Ўзгаришларга кўникиш осон эмас. Қўшимчасига мен мавсумолди тайёргарлик йиғинларида қатнашмаган эдим. Ўзим ва оилам янги шаҳарга мослашишимизга тўғри келди. Бу жуда оғир кечди, - деди Лионель Месси.

Месси ПСЖдан “Барселона”га кўчиб ўтишни истаганди. Лекин каталонияликлар молиявий инқироз туфайли бу трансферни амалга ошириш ечимини топа олмади. Энди Месси АҚШ чемпионатида тўп тепадиган бўлди.