Месси “Барселона”га якуний жавобини берди

2023 йилдан бери АҚШнинг “Интер Майами” жамоасида ўйнаётган Лионель Мессини “Барселона”га қайтариш масаласи кейинги пайтда яна кўтарила бошлади.

Яқинда “Барселона” президентлиги учун сайлов бўлади. Номзодларнинг барчаси сайловда ғолиб чиқиш мақсадида жамоага Мессини қайтаришини таъкидлаяпти.

38 ёшли юлдуз бу масала бўйича келажакдаги режаларини аниқ белгилаб олган. Месси номзодларнинг барчасига “Барселона”га футболчи сифатида қайтмаслигини маълум қилган.

Бу ҳақда Catalunya Radio журналистлари хабар тарқатди.

Шу билан бирга, манбага кўра, аргентиналик фаолиятини якунлагандан сўнг Каталонияга бошқа ролда қайтиш имкониятини истисно қилмайди.

Лионель Месси “Барселона” клуби тизимида 20 йилдан ортиқ вақт ўтказган. У клубни 2021 йил ёзида тарк этган.

Саккиз карра “Олтин тўп” соҳибининг “Интер Майами” билан амалдаги шартномаси 2028 йил охиригача мўлжалланган. “Барса”нинг янги президенти сайлови 15 март куни бўлиб ўтади.