Месси бу рекордни ўрнатганини ўзи ҳам билмай қолди

Аргентина терма жамоаси тарихида энг катта ёшда гол урган футболчи сифатида энди Лионель Месси қайд этилди.

"Интер Майами" ҳужумчиси аргентиналикларнинг  Исландия терма жамоасига қарши ўтказган ўртоқлик учрашувида (3:0) 72-дақиқада пенальтидан гол урди.

38 ёш 350 кунлик пайтида Аргентина терма жамоаси учун гол урган Месси ёши энг катта гол муаллифига айланди. У шу тариқа 1957 йил июлидан бери сақланиб келаётган "Ривер Плейт" афсонаси Анхель Лабрунага тегишли рекордни янгилади. Лабруна терма жамоа сафида 38 ёш 282 кунлик чоғида тўп киритган эди.

Исландия дарвозасига йўл олган бу гол Мессининг Аргентина миллий жамоаси таркибидаги 117-голига айланди.

Шу пенальти Мессининг профессионал фаолиятидаги 911-гол бўлди. Қиёс учун, Криштиану Роналду ҳисобида ҳозирча 973 та гол бор.