Messi dahshatli rekord o‘rnatdi, lekin Fayzullaev qilgan ishni uddalay olmadi!

АҚШ, Мексика ва Канада биргаликда мезбонлик қилаётган 2026 йилги жаҳон чемпионатида яна бир тарихий рекорд қайд этилди. Бу воқеа саккиз карра “Олтин тўп” соҳиби Лионель Месси иштирокида бўлди.

Аргентина миллий терма жамоаси сардори ва машҳур тўпурари Лионель Месси жаҳон чемпионати гуруҳ босқичининг 2-турида Австрияга қарши баҳсда (2:0) дубль муаллифи бўлди.

Бу икки гол Лионель Мессини жаҳон чемпионатлари финал босқичларида энг кўп гол урган футболчига айлантирди. Бу галги мундиалда дастлабки иккита учрашувда бешта тўп киритган аргентиналик юлдуз умумий голлари сонини 18 тага етказиб, мутлақ рекорд ўрнатди. Бунинг учун Мессига жаҳон чемпионатларидаги 28 та учрашув етарли бўлди.

Аввалги энг юксак натижа Германия терма жамоаси собиқ ҳужумчиси Мирослав Клозега тегишли бўлиб, у жаҳон чемпионатларида 24 та ўйинда жами 16 та гол урган эди.  

Қизиғи шундаки, Месси мундиалда бирор маротаба боши билан тўп кирита олмаган. Мессини ўзига намуна деб биладиган Ўзбекистон миллий терма жамоаси вакили Аббосбек Файзуллаев жаҳон чемпионатидаги илк голини Мессидан фарқли равишда бош билан киритди. Шу тариқа, Аббосбек XXI асрда мундиалларда боши билан гол урган энг бўйича паст (бўйича 167 сантиметр) футболчи сифатида рекорд ўрнатди. Лионель Месси ҳам жаҳон футболида Файзуллаев сингари бўйи баланд бўлмаган футболчилар қаторига киради. 

Жаҳон чемпионатларида олтинчи бор иштирок этаётган 38 ёшли Лионель Месси турнир давомида 12 та турли терма жамоа дарвозасига гол урган футболчига айланди.

Австриядан аввал Месси қуйидаги жамоалар дарвозасига ҳам гол урган:

• Сербия ва Черногория — 1 та гол;
• Босния ва Герцеговина — 1;
• Эрон — 1;
• Нигерия — 3;
• Саудия Арабистони — 1;
• Мексика — 1;
• Австралия — 1;
• Нидерландия — 1;
• Хорватия — 1;
• Франция — 2;
• Жазоир — 3.

Австрияга қарши баҳсда аргентиналик юлдуз ҳар икки бўлимда биттадан гол урди (38 ва 90+5-дақиқалар) ва ғалабани таъминлади. Аргентина икки турдан кейин 6 очко жамғариб, гуруҳда биринчи ўринни эгаллаган ҳолда муддатидан олдин плей-офф йўлланмасини қўлга киритди.

Чемпионлик унвонини муносиб ҳимоя қилаётган Аргентина миллий терма жамоаси гуруҳ босқичининг сўнгги турида Иордания футболчиларига қарши майдонга тушади.