Месси “эл-класико”да ўйнамайди

Испания чемпионатининг энг кескин ва муросасиз учрашуви – “эл-класико”да Лионель Месси “Барселона”га ёрдам бера олмаслиги мумкин.

Чунки Аргентина терма жамоаси мураббийлар штаби Мессини 2022 йилги жаҳон чемпионати саралаш мусобақаси доирасидаги учрашувларга жалб этишни режалаштирган. Агар Месси 8 ва 13 октябрь кунлари Эквадор ва Боливияга қарши учрашувларда қатнашадиган бўлса, ватанига мусобақадан икки ҳафта олдин бориб, карантинда ўтириши керак.

Бундан ташқари, Лионель Месси терма жамоа ихтиёридан Испанияга қайтганидан кейин ҳам 14 кунлик карантинга олинади. Чунки Испания ҳукумати Жанубий Америка мамлакатларидан келганлар учун мажбурий карантин жорий қилмоқда. Месси Аргентинадан энг тез қайтган тақдирда ҳам, Каталонияга 14 октябрь куни етиб келади.

Шунинг учун, Лионель Месси 18 октябрда “Хетафе”, 25 октябрда “Реал” ва 1 ноябрда  “Алавес” билан бўладиган ўйинларда қатнаша олмайди.