Месси Испания терма жамоаси чорловини рад этганини тан олди

Айни пайтда “Интер Майами”да ўйнаётган Лионель Месси фаолиятининг илк босқичида фуқароликни ўзгартириш имконияти бўлганини ва муҳим танловни амалга оширишига тўғри келганини айтди.

Аргентиналик юлдуз уни Испания терма жамоасига жалб қилишга уринишлар бўлганини ошкор қилди.

- Бир пайт Испания терма жамоаси раҳбарияти мен билан боғланган ва мени улар учун ўйнашга кўндиришга ҳаракат қилган.

Мен аргентиналикман, лекин жуда ёшлигимда Барселонага келганман. Испания учун ўйнаш имконияти бор эди, аммо мен ҳар доим Аргентина учун ўйнашни хоҳлаганман, - деди Месси.

Лионель Месси Аргентина миллий терма жамоаси сафида 2005 йилнинг 17 августида Венгрия футболчиларга қарши ўйинда дебют қилган. У 64-дақиқада майдонга тушган, аммо бир дақиқа ўтмай рақибига қўпол зарба бергани учун қизил карточка олган.

Кейинчалик Мессининг халқаро миқёсдаги ишлари юришиб кетди. У миллий жамоа сафида ҳозиргача 196 ўйин ўтказиб, 115 гол урди. Бу жаҳон футболида Криштиану Роналдудан кейинги иккинчи кўрсаткичдир.

Месси Аргентина терма жамоаси сафида икки марта Америка кубоги ва 2022 йилги жаҳон чемпионатида ғолиб чиққан.