Месси Испанияда “Барселона”нинг икки футболчиси билан учрашди (фото)

Франция чемпионатининг дастлабки турида “Клермон”ни мағлуб этган (5:0) ПСЖ футболчилари кичик дам олиш имкониятига эга бўлди. Лионель Месси бу вақтдан фойдаланиб, Барселонага боришга қарор қилди.

Аргентиналик у ерда эски дўстлари билан кечки овқат қилди. Ҳашаматли ресторанда Месси билан бирга бўлганлар орасида "Барселона"нинг икки футболчиси - Серхио Бускетс ва Хорди Альба ҳам бор эди.

Шунингдек, Лионелнинг ҳозирги икки жамоадоши Леандро Паредес ва Марко Верратти ҳам базмда қатнашган. “Mudpo Deportivo” нашрининг хабар беришича, футболчилар у ерда клубдаги келажаги борасида суҳбатлашган.

Сўнгги пайтларда матбуотда Лионель Мессининг келаси ёзда "Барселона"га қайтиши мумкинлиги ҳақида кўплаб миш-мишлар тарқалган эди. Бир қанча ОАВ учрашув айнан шу сабаб ўтказилган дея тахмин қилишмоқда.