Месси: Мен бу жамоага ўтишни хоҳламаганман!

Лионель Месси фаолиятини “Интер Майами”да давом эттиришга қарор қилганидан кейин Европада бошидан ўтказган воқеаларни айтиб бермоқда.

Бу гал аргентиналик юлдуз ўзини тарбиялаган ва фаолиятининг катта қисмини ўткаўган “Барселона”дан Париж суперклубига ўтишга тўғри келган вазиятни эсга олди.

- Менинг ПСЖга ўтишим ўзим истаган иш эмасди. Мен Барселонадан кетишни хоҳламасдим. Ҳаммаси кечаси рўй берди. “Барселона”да узоқ вақт ўйнаганимдан кейин бошқа жамога кўникишимга тўғри келди, - деди Лионель Месси.

Аргентиналик юлдуз ПСЖда етарлича муаммоларга дуч келди. Парижлик мухлислар бутун дунё футбол ишқибозлари меҳрини қозонган Мессини қабул қилгани йўқ.

Месси ПСЖда жами 75 та учрашувдан майдонга тушиб, ўз ҳисобига 32 та гол ва 35 та ассист расмийлаштириб қўйди.