Месси кетма-кет учинчи мундиалда пенальтидан гол ура олмади

Аргентина терма жамоаси ҳужумчиси Лионель Месси Жаҳон чемпионатларида учинчи мусобақа кетма-кет пенальтини аниқ амалга ошира олмади.

2026 йилги мундиал гуруҳ босқичи 2-турида Австрияга қарши кечаётган учрашувнинг 7-дақиқасида аргентиналиклар пенальти ишлаб олди.

11 метрлик жарима зарбасини бажариш учун тўп қаршисига келган 38 ёшли Месси зарбани чап оёғи билан йўллади, аммо тўп дарвозанинг ўнг пастки бурчаги ёнидан ўтиб кетди.

Шу тариқа, Аргентина сардори Жаҳон чемпионатларида учинчи мусобақа кетма-кет пенальтидан фойдалана олмаган ҳолатни қайд этди.

Месси 2022 йилги Жаҳон чемпионатида Польшага қарши баҳсда ҳам пенальтини голга айлантира олмаганди. Ундан аввал эса 2018 йилги мундиалда Исландия дарвозабонини 11 метрлик нуқтадан мағлуб эта олмаган.

Қайд этиш жоиз, Аргентина ва Австрия ўртасидаги учрашувнинг биринчи бўлими мазкур хабар ёзилаётган вақтда 0:0 ҳисобида давом этмоқда.