Месси яна Парижда ўйнашга қарор қилди

ПСЖ шарафини икки йил давомида  ҳимоя қилган Лионель Месси яна Франция майдонларида тўп тепадиган бўлди.

Гап шундаки, Франция пойтахти келаси ёз ОЛимпия ўйинларига мезбонлик қилади. Саккиз карра “Олтин тўп” соҳиби эса, Аргентина олимпия терма жамоаси сафида ушбу нуфузли мусобақада қатнашишни режалаштирмоқда.

Goal.com нашрининг ёзишича, яна бир тажрибали футболчи Анхель Ди Мария ҳам Олимпиадада иштирок этмоқчи. Унинг бу турнирга бориши Мессининг якуний қарорига боғлиқ бўлади.

Аргентина олимпия терма жамоаси бош мураббийи Хавьер Маскерано ҳам таркибда икки нафар футбол афсонаси ўйнаши мумкинлигини таъкидлаган. Қолаверса, Маскерано Месси ва Ди Мария Париж Олимпиадасига бориши ва уларга устозлик қилиш учун ўз ўрнини Аргентина миллий терма жамоаси бош мураббийи Лионель Скалонига бўшатиб беришга тайёрлигини айтди.

Лионель Месси совринлари қаторида Олимпия ўйинлари олтин медали ҳам. 2008 йили Лео ўз ҳамюртлари билан бирга Пекинда ўтказилган мусобақада ғолиб чиққан. Ўша таркибда Месси билан бирга Хавьер Маскеранонинг ўзи, Анхель Ди Мария ва Серхио Агуэро каби юлдузлар ўйнаган.