Месси ёки Роналду? "Оқ-тепа"ни тарк этиш можаролар билан боғлиқми? - Зиданнинг қўшниси бўлган "Машъал"нинг испаниялик мураббийи билан эксклюзив суҳбат

Куни кеча хабар берганимиздек, “Машъал” клуби испаниялик Серхио Маринангели билан келишувга эришди. Табиийки, бу хабар кўпчиликка қизиқ туюлди.

Жорий мавсум ўрталарида “Оқ-тепа” клубининг таклифига биноан юртимизга келган Серхиони ҳали яқиндан билмасдик. Асосан “Оқ-тепа”да фаолият кўрсатганидан хабардор эдик холос.

Тўғрисини айтганда, ушбу мураббий билан яқиндан танишиш ва у билан суҳбатлашиш режамиздан ўрин олганди. Аммо қачон ва қай тариқа уни амалга ошириш ҳақида ўйлаётгандик. Унинг “Машъал” клубига ўтгани эса биз учун айни муддао бўлди. Натижада Маринангелини “қидиришга” тушдик ва излаганга толе ёр деганларидек, меҳнатимиз самараси ўзини узоқ куттирмади. У билан яқиндан танишдик ва суҳбатлашиш таклифимизга розилик берди.

Дарвоқе, у асосан испан тилида сўзлашади. Инглизчада эса оз-моз. Шу боис Серхио билан суҳбатда бизга яқиндан кўмаклашгани учун ҳамкасбимиз Абдулбосит Валихоновга ҳам ўз миннатдорлигимизни билдиришни лозим топдик.

-  Серхио, сизни “Машъал” клуби билан келишувга эришганингиз билан табриклаймиз. Лекин сизни ҳали ўзбекистонлик мухлислар у қадар яқиндан билмайди. Фақат маълум муддат “Оқ-тепа”да ишлаганингиздан хабардормиз. Дастлаб ўзингиз ҳақингизда ишқибозларга кенгроқ маълумот берсангиз!

-  Салом, менинг исмим Серхио Адриан Маринангелли. 36 ёшдаман. Аргентиналикман, 17 йилдан буён Испанияда яшаб келаман. Мен собиқ футболчиман, Аргентина, Испания ва Греция жамоаларида тўп сурганман. Аммо улар олий лига жамоалари эмасди. Испаниянинг бир қатор клубларида мураббийлик қилганман, асосан Мадрид лигасида фаолият олиб борганман. 2012-2016 йиллар мобайнида Экваториал Гвинея терма жамоасининг мураббийлар штабида ишлаганман. “Оқ-тепа” клуби мен билан мавсум сўнгигача шартнома тузганди. Шунингдек, менда Женева халқаро мактабида футбол академияси мураббийи бўлиб ишлаш таклифи ҳам бор эди.

-  “Оқ-тепа”га келган пайтингизда ниятларингиз катта эканлигини айтгандингиз. Бироқ у ердаги фаолиятингиз узоқ чўзилмади. Бу нима билан боғлиқ? Ёки “Оқ-тепа”даги фаолиятингиз орқали айтганда, у ер сиз ўйлагандек эмас эканми?

-  Менинг режаларим 100 фоиз аниқ эди. Ажойиб клубда иш олиб бордим, алоқаларимиз доим яхши бўлиб келди. Менимча, жамоа ўйини анча яхшиланди, бунда менинг ва бош мураббийнинг хизматлари бор. Натижалар кутилганидек бўлмади, холос. “Оқ-тепа” эшикларини қаттиқ ёпмайман, мен бу ерга қайтаман, фақат берилган имкониятдан фойдаланиб кўришга қарор қилдим.

-  “Машъал” клуби билан келишувга эришганингизни очиғи кутмагандик. Бу таклиф қандай пайдо бўлди? Бу жамоа нимаси билан сизни ўзига жалб қилди?

-  Ушбу шартноманинг амалга ошишида “Эл Голасо” агентлиги катта ўрин тутди. Менинг лойиҳамни бир қанча вақт мобайнида кўриб чиқишди. Ва ниҳоят, келишувга эришдик. Бу ҳамкорлик қизиқарли бўлиши аниқ. Кутилган натижалар бўлишига умид билдирамиз.

-  Футболимизни яқинда ўрганишни бошладингиз. Айтинг-чи, бу борадаги дастлабки таассуротларингиз қандай? Сизга ёққан ва ёқмаган жиҳатлари нимада кўриняпти?

-  Мен ўзбек футболини бир неча йиллардан буён кузатиб келаман, Мадрид академиясида мураббийликка ўқиган давримда ўзбекистонлик дўстим бўлар эди. Унинг таъсири остида ўзбек футболини кузата бошлаганман. Футболингиздаги асосий плюс томон шундаки, сизларда яхши футбол намойиш этиш учун барча шароитлар бор. Футболчиларингиз анча яхши даражада. Энг катта камчилигингиз - футболчиларнинг жисмоний ҳолатида. Бу футболингизни ўсишдан тўхтатиб қўювчи энг катта омил.  Агар шу камчилик бартараф этилса, сизнинг футболингиз Осиёда биринчи рақамли бўлади.

-  Ўзбекистонлик дўстингиз ким?

-  Менинг дўстим Зокиржон Холиқов. У билан Мадридда иккинчи даражали мураббий лицензияси учун ўқиганмиз. Унга мени Жаҳонгир Усмонов билан таништириб қўйгани учун раҳмат айтаман, у ҳам ажойиб инсон ва яхши дўст

-  Аслида юртимизда фаолият олиб боришингиздан асосий мақсад нима? Бу ерда нимадир ўрганмоқчимисиз ёки футболимизга қандайдир янгилик олиб кирмоқчимсиз?

-  Менинг ушбу давлатда ишлай бошлаганим сабабини бирдан тушунтириб бериш қийин масала. Бизнинг ишимиз ҳар доим ҳам натижа келтирмаслиги мумкин. Мен асосан футболчилар билан ишлайман, уларга Европа даражасидаги футболчи бўлиб етишиши учун ёрдам бераман, бу бир-икки ойда ҳосил берадиган иш эмас, вақт талаб қилади. Биз футболчиларга тўғри карьера олиб бориш ва кучли футболчи бўлиш босқичларида ёрдам берамиз.

-  Одатда хорижлик мутахассиснинг бошқа юртда меҳнат қилишининг замирида маблағ билан боғлиқ масала асосий ўринда туради. Биламизки, “Машъал” мавсум давомида молиявий қийинчиликларни бошдан кечирди. Сир бўлмаса, клубга қандай талаблар қўйдингиз?

-  Ҳа, кўпчилик мураббийлар четга ўзига хос мақсадлар билан чиқади. Мен Ўзбекистонда ҳар тарафлама яхши муҳитдаман. Ҳам инсонийлик, ҳам профессионаллик жиҳатидан ўсишга эришмоқдаман. Мен оиламни ташлаб “Оқ-тепа”га келдим ва яна бир оилага эга бўлдим.

-  Чемпионатимиз ўйинларини кузатган бўлсангиз керак, сизга қайси мураббийнинг иши ёқди?

-  Услубларни солиштириш қийин масала, ҳар бир жамоада ўз имкониятидан келиб чиққан услуб мавжуд. Ўз услубига эга бўлмаган клубда натижа бўлмайди. Телевизорда футбол кўраётиб жамоа услуби ҳақида гапира олмайсиз. Асосан “Пахтакор”да шаклланган услуб кўрганман. Уларнинг услуби натижаларни кафолатлайдиганлар сирасига киради.

-  Эшитишимизча, ўз вақтида Марсело Бьелсанинг иш услубини яқиндан ўрганган экансиз. Яна қайси топ-даражадаги мутахассисларнинг ишини кузатгансиз?

-  Мен Зидан билан анча яхши танишман, лекин яқин дўстмиз ва яқин алоқаларга эгамиз дея олмайман. У менинг маҳалламда туради ва ҳар гал унинг уйи олдидан ўта туриб, футбол ҳақидаги икки оғиз фикрларини эшитишга ҳаракат қиламан.

-  Ажойиб-ку! Зидан билан охирги марта қачон гаплашгансиз?

-  Сўнгги маротаба 3 ой олдин, Ўзбекистонга келмасимдан илгари кўришгандим. У билан нон дўконида кўришиб қолгандик ва футбол ҳақида суҳбатлашиб уйга қайтган эдик.

-  Бунга қадар ўзбек футболи ҳақида қандай тасаввурда эдингиз? Футболимизда кимларни билардингиз ва бу ерга келиб иш бошлагач, ўзингиз учун нималарни кашф қиляпсиз?

-  Бу ерга келгунимча ҳам мамлакат футболи ҳақида баъзи нарсаларни билардим, аммо у қадар кўп эмас. Келганимдан буён Про-лига ва Суперлиганинг кўплаб мураббийлари билан учрашишга эришдим ва кўпчиликлари мени ҳайратда қолдиришди. Улар футболни ҳис қила олиши билан эътиборимни тортди.

-  “Машъал” клубининг ўз ўйин услуби бор. Жамоа асосан академиясидаги ёшларга таянади. Айтинг-чи, сиз жамоага янги услуб, яъни, янги тактика ва ғояларни кирита оласизми? Бу борада қандай режаларингиз бор?

-  Мен “Машъал”нинг футбол фалсафаси ҳақида биламан ва назаримда улар тўғри йўлда. Суперлига жамоасида тажриба орттириш ажойиб бўларди. Мен ишга фидоийлик билан ёндаша оламан. Аминманки, ушбу клубда мен кўпроқ нарса ўрганаман. Уларга бера оладиган нарсамдан, ўрганадиган жиҳатларим кўпроқ.

-  Серхио, сиз “Реал” клубида малака оширган экансиз. “Барселона” билан “Реал” доим жиддий рақобатни юзага келтиришади. Сизнингча, “Реал”ни “Барса”дан устун томони нимада? Испанияда қайси жамоанинг мухлиси кўп?

-  “Барселона”нинг энг катта ютуғи у футболчиларни ўз академиясидан олади (“Машъал” каби). “Реал” эса футболчиларни сотиб олади. Албатта, “Реал”нинг мухлислари кўпроқ.

-  Дунёда Роналду ва Мессининг мухлислари кўп ва доим ким кучли эканлиги катта муҳокамаларга сабаб бўлади. Испаниялик мутахассис сифатида бу саволга қандай жавоб берасиз?

-  Месси сўзсиз энг кучли футболчи. Ҳа, Роналду унга яхши рақобат кўрсата олди, аммо барибир уни Месси билан солиштириб бўлмайди.

-  Роналду Испаниядан Италияга кетгани бу испан Ла Лигасига қанчалик таъсир кўрсатди? “Реал” уни сотиш орқали хатога йўл қўйган, деб ўйлайсизми?

-  Роналдунинг кетиши Ла Лиганинг муҳим бўлагидан айрилишини англатди, унинг ўрнини тўлдириш ҳозирча имконсиз.

-  Ўзбекистонлик Элдор Шомуродов Италия А сериясида тўп суряпти ва бу Европанинг кучли бешлик чемпионатидаги ягона ўйинчимиз. Сизнингча, ўзбекистонлик футболчилар Испания Ла Лигасида тўп суришга салоҳияти етарли, деб ўйлайсизми? Агар шундай бўлса, қайси ўйинчиларимиз Испанияда бемалол тўп сура олишлари мумкин?

-  Ўзбекистонда бир қанча кучли футболчилар бор. Улар бемалол Европанинг кучли чемпионатларида тўп сура олади. Маркетинг ишларини тўғри йўлга қўя олишса, ўзбек футболчиларининг Европадаги бозори чаққон бўлади. Осиё кубогида намойиш этган ўйинингиздан шунга амин бўлганманки, юртингиз футболи катта натижаларга эриша олади ва Қатардаги жаҳон чемпионатига чиқа оласизар.

-  Қизиқарли суҳбатингиз учун раҳмат. Умид қиламизки, Ўзбекистондаги фаолиятингиз сиз учун муваффақиятли кечади.

-  Сизга ҳам раҳмат.