Мессига Роналдудан кўп маош таклиф қилишди

Лионель Мессининг келажаги ҳамон мавҳум бўлиб турибди. Уч ойдан кейин жаҳон чемпиони эркин агентга айланади.

ПСЖ раҳбарияти ўз ҳужумчиси билан янги битим борасида келиша олгани йўқ. “Барселона” Леони қайтариш учун молиявий масалаларни ҳал қилиб улгуриши керак. Гарчи Мессининг ўзи Европада қолиб, Чемпионлар лигаси ғолиблиги ва “Олтин тўп” учун курашини истаётган бўлса-да, маошининг катталиги клубларга етарлича муаммо бўлиши аниқ.  

Шунга қарамай, Месси учун пулини аямайдиган жамоалар чиқмоқда. Саудия Арабистонининг “Ал-Ҳилол” жамоаси амалдаги жаҳон чемпионини олиш фикридан қайтгани йўқ.

“Ал-Ҳилол” хўжайинлари аргентиналик юлдузга унинг доимий рақобатчиси Криштиану Роналду “Ан-Наср”да олаётган маошдан каттароқ маблағ беришга тайёр. Маълумки, португалиялик тўпурар риёдликлар билан 2,5 йиллик шартнома тузиб, ҳар мавсум учун 200 миллион евро маош олишга келишган.